សហរដ្ឋអាមេរិក សហភាពអឺរ៉ុប និងប្រទេសផ្សេងទៀត កំពុងធ្វើការដើម្បីដឹកជញ្ជូនស្បៀងអាហារ និង​ជំនួយផ្គត់ផ្គង់បន្ទាន់ផ្សេងទៀតដល់តំបន់ ហ្កាហ្សា តាមច្រករបៀងសមុទ្រ។ ចំណាត់ការនេះ ធ្វើ​ឡើង​ ខណៈបុគ្គលិកជំនួយបានព្រមានថា ពលរដ្ឋកំពុង​ប្រឈម​មុខ​ទៅ​នឹង​ការ​គំរាម​កំហែង​នៃ​ភាព​អត់ឃ្លាន​។ អ៊ីស្រាអែល បានកាត់ផ្តាច់ផ្លូវគោក ស្ទើរតែទាំងស្រុងចូលទៅកាន់តំបន់ហ្កាហ្សា។ ការទម្លាក់ជំនួយពីលើអាកាស មួយចំនួនត្រូវបានធ្វើឡើង ប៉ុន្តែវាមិន​គ្រប់​គ្រាន់​សម្រាប់​កង្វះ​អាហារ និងថ្នាំពេទ្យនោះទេ។ មន្ត្រីសហរដ្ឋអាមេរិក បានប្រកាសបង្កើតច្រករបៀងសមុទ្រ ដែល​ប្រើ​ផែ​បណ្តែតទឹកបណ្ដោះអាសន្ន។ សហភាពអឺរ៉ុប គឺជាដៃគូមួយក្នុងចំណោមដៃគូជាច្រើន ដែល​ចូល​រួម​ក្នុងផែនការនេះ។

ប្រធានគណៈកម្មការអឺរ៉ុប លោកស្រី Ursula von der Leyen បាន​ទៅ​ពិនិត្យ​កំពង់ផែ​មួយ​កន្លែង​ក្នុង​ប្រទេសហ្សីប ដើម្បីមើលការងាររៀបចំមួយចំនួន។ លោកស្រី​និយាយថា ទោះ​បី​ជា​មាន​បញ្ហា​ប្រឈម​ច្រើន នេះជាការបំផុសគំនិតយ៉ាងពិតប្រាកដ ដែលបច្ចុប្បន្ន យើងខិតជិត​ដល់​ការ​បើក​ច្រក​របៀង​ហើយ។ ប្រទេសនានា ដែលចូលរួមក្នុងគម្រោងនេះ បានចេញសេចក្តីថ្លែង​ការណ៍រួម​មួយ​កាល​ពីថ្ងៃសុក្រ ដោយទទួលស្គាល់ផ្លូវនេះថា នឹងមានភាពស្មុគស្មាញ។ ពួកគេ​បាន​និយាយ​ថា ច្រករបៀងត្រូវតែជាផ្នែកមួយនៃ «កិច្ចខិតខំប្រឹងប្រែងដែលមាននិរន្តរភាព» ដើម្បីបង្កើន​លំហូរ​ជំនួ​យ​ តាមរយៈផ្លូវដែលអាចធ្វើទៅបានទាំងអស់។ រដ្ឋមន្ត្រីការបរទេសអង់គ្លេស លោក David Cameron បានសម្តែងការព្រួយបារម្ភថា ផែនការដឹកនាំដោយសហរដ្ឋអាមេរិក នឹងត្រូវ​ការ​ពេល​វេលា​។

កងកម្លាំងអ៊ីស្រាអែល ត្រូវបានចោទប្រកាន់កាលពីចុងខែមុនថា បានសម្លាប់មនុស្សជាង ១០០ នាក់ដែលប្រមូលផ្តុំនៅជុំវិញរថយន្តដឹកទំនិញដែលកំពុងផ្តល់ជំនួយ។ ទោះបីជាយ៉ាងណា បន្ទាប់ពីការស៊ើបអង្កេត មន្ត្រីយោធាបាននិយាយថា ទាហានបានបាញ់ទៅលើហ្វូងមនុស្ស ដែល​ពួកគេចាត់ទុកថាជា ជនសង្ស័យ ដែលនឹងជាការគំរាមកំហែង។ ប៉ុន្តែ ប៉ាឡេស្ទីន បដិសេធ​ការ​សន្និដ្ឋាននេះ ហើយបានអំពាវនាវឱ្យមានការស៊ើបអង្កេតឯករាជ្យជាអន្តរជាតិមួយ៕