រដ្ឋាភិបាលជប៉ុន តាមរយៈស្ថានទូតរបស់ខ្លួនប្រចាំនៅកម្ពុជា បាន​ប្រកាស​ថា​នឹង​ផ្តល់​កម្ចីការ​ប្រាក់ទាប ដល់កម្ពុជា​ចំនួន​ជាង ១៥០លានដុល្លារ​អាមេរិក សម្រាប់​អនុវត្ត​គម្រោង​អភិវឌ្ឍន៍​មន្ទីរ​ពេទ្យ​ក្នុង​តំបន់ ខណៈ កម្ចីនេះនឹងចុះហត្ថលេខាផ្តល់ និងទទួលនៅរសៀលថ្ងៃទី១៣ ខែមីនា ឆ្នាំ​២០២៤នេះ។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បានឲ្យ ដឹងថា នៅថ្ងៃទី១៣ ខែមីនា ឆ្នាំ២០២៤នេះ កម្ពុជា និងជប៉ុននឹងចុះហត្ថលេខាលើកិច្ចព្រមព្រៀង ស្តីពី ការផ្តល់ឥណទានសម្បទានប្រាក់យ៉េនដែលមានទឹកប្រាក់ចំនួន២១.១០៤លានយ៉េន ស្មើ​និង​១៥៤លាន ដុល្លារអាមេរិក សម្រាប់អនុវត្តគម្រោងអភិវឌ្ឍន៍មន្ទីរពេទ្យក្នុងតំបន់។

តាមសេចក្តីប្រកាសព័ត៌មាន ឯកឧត្តម សុខ ចិន្តាសោភា ឧបនាយក​រដ្ឋ​មន្រ្តី​រដ្ឋមន្រ្តី​ក្រសួង​ការ​បរទេស និងសហប្រតិបត្តិការអន្តរជាតិ និងឯកឧត្តម កុមីរ៉ាម៉ាសាហ៊ីរ៉ូ អនុរដ្ឋមន្រ្តី​ការ​បរទេស​ជប៉ុន​ នឹងចុះ ហត្ថលេខាលើលិខិតប្តូរសារ និងឯកសារពាក់ព័ន្ធខាងលើ នៅទីស្តី​ការ​ក្រសួង​ការ​បរទេស និងសហប្រតិ បត្តិការអន្តរជាតិនារសៀលថ្ងៃទី១៣ ខែមីនានេះ។

សេចក្តីប្រកាសព័ត៌មានរបស់ក្រសួងការបរទេសដដែល បានឲ្យបន្ថែមទៀតថា ការផ្តល់ឥណទាន សម្បទាននេះ បញ្ជាក់ពីការប្តេជ្ញា​ចិត្ត​ឥតងាក​រេ​របស់​ជប៉ុន​ក្នុង​ការ​គាំទ្រដ​ល់​កិច្ច​ខិត​ខំ​ប្រឹង​ប្រែង​របស់​រាជរដ្ឋាភិបាលកម្ពុជា ចំពោះការជំរុញការអភិវឌ្ឍសង្គម-សេដ្ឋកិច្ច។ ការគាំទ្រនេះ នឹងរួម​ចំណែក​ផង​ដែរដល់ ការពង្រឹងទំនាក់ទំនងយូរអង្វែង និងកិច្ចសហប្រតិបត្តិការ​ដ៏​ជិន​ស្និទ្ធ​រវាង​ប្រទេស​ទាំង​ពីរ(កម្ពុជា-ជប៉ុន) ដែលនៅក្នុងឆ្នាំ២០២៣ ត្រូវបានដំឡើង​កម្រិទ​ទៅ​ជា​«ភាព​ជាដៃគូ​យុទ្ធ​សាស្រ្តគ្រប់ជ្រុងជ្រោយ»៕ អត្ថបទ៖ បាន ចក់