សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី នៃព្រះរាជាណាចក្រកម្ពុជា នៅថ្ងៃទី១៣ ខែមីនា ឆ្នាំ២០២៤នេះ បានអនុញ្ញាតឱ្យឯកឧត្ដម Nkubito Manzi BAKURAMUTSA ឯកអគ្គរដ្ឋទូត​តែងតាំង​ថ្មី នៃសាធារណរដ្ឋរវ៉ាន់ដា ចូលជូនសារតាំង និងសម្តែងការគួរសម នៅវិមានព្រឹទ្ធសភា ។

ក្នុងព្រះបរមនាមព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា ក្នុងនាមព្រឹទ្ធសភា រដ្ឋសភា រាជរដ្ឋាភិបាលកម្ពុជា និងក្នុងនាម​សម្តេច​ផ្ទាល់​ សម្តេចវិបុលសេនាភក្តី សាយ ឈុំ បានសម្តែងអំណរសាទរស្វាគមន៍ ចំពោះឯកឧត្ដម Nkubito Manzi BAKURAMUTSA ដែលត្រូវបានឯកឧត្តមប្រធានាធិបតី នៃសាធារណរដ្ឋ​រវ៉ាន់ដា តែងតាំងឯកឧត្តមជាឯកអគ្គរដ្ឋទូតវិសាមញ្ញ និងពេញសមត្ថភាព នៃសា​ធារណរដ្ឋ​រវ៉ាន់​ដា​ប្រចាំ​កម្ពុជា​។

ក្នុងឱកាសនោះ ឯកឧត្ដម Nkubito Manzi BAKURAMUTSA បានថ្លែងអំណរគុណ​យ៉ាង​ជ្រាល​ជ្រៅ​ចំពោះ​សម្តេចប្រមុខរដ្ឋស្តីទី ដែលបានចំណាយពេលវេលាដ៏មានតម្លៃ អនុញ្ញាតឱ្យ​ឯកឧត្តម​ចូល​ជួប​ជូន​សារតាំង និងសម្តែងការគួរសមនាពេលនេះ ហើយក្នុងបេសកកម្ម​ការទូត​នៅ​ក​ម្ពុ​ជា​នេះ ​នឹងបន្តខិតខំពង្រឹងពង្រីកចំណងមិត្តភាព និងកិច្ចសហប្រតិបត្តិការ រវាងប្រជាជន និង​ប្រទេស​ទាំង​ពីរ ឱ្យកាន់តែល្អប្រសើរឡើងថែមទៀត ដើម្បី​នាំ​មក​នូវ​ផល​ប្រយោជន៍​ដ៏​ធំធេង​ទៅវិញទៅមក​សម្រាប់ប្រជាជន និងប្រទេសទាំងពីរ ។

ក្នុងឱកាសនោះ សម្តេចវិបុលសេនាភក្តី បានកត់សម្គាល់ដោយពេញចិត្ត ចំពោះទំនាក់ទំនង និង​កិច្ច​សហប្រតិបត្តិការដ៏ល្អរវាងប្រទេសទាំងពីរ ដោយសម្តេចមានជំនឿជឿជាក់ ក្នុង​ឋានៈ​ឯកឧត្តម​ជា​ឯកអគ្គរដ្ឋទូតថ្មីនេះ នឹងបន្តខិតខំពង្រឹងពង្រីកចំណងមិត្តភាព និងកិច្ច​សហប្រតិបត្តិការ​រវាង​ប្រជាជន និងប្រទេសទាំងពីរ ឱ្យកាន់តែល្អប្រសើរឡើងថែមទៀត ។

សម្តេចប្រមុខរដ្ឋស្តីទី បានគូសបញ្ជាក់ថា ព្រឹទ្ធសភា រដ្ឋសភា រាជរដ្ឋាភិបាល ក្រសួង ស្ថាប័ន​ជាតិ​កម្ពុជា​ត្រៀមខ្លួនជានិច្ច ដើម្បីធ្វើកិច្ចសហប្រតិបត្តិការដ៏ជិតស្និទ្ធជាមួយទូតថ្មី និងរដ្ឋាភិបាល នៃ​សាធារណ​រដ្ឋរវ៉ាន់ដា ដើម្បីលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការ នាំមកនូវ​ផល​ប្រយោជន៍ទៅវិញទៅមកសម្រាប់ប្រជាជន និងប្រទេសទាំងពីរ ។

តាមរយៈឯកឧត្តមឯកអគ្គរដ្ឋទូត សម្តេចប្រមុខរដ្ឋស្តីទី បានពាំនាំនូវ​ព្រះរាជ​បណ្តាំ​សួរ​សុខ​ទុក្ខ​ប្រកប​ដោយ​ក្តីនឹករលឹក អំពីព្រះករុណាព្រះបាទសម្តេចព្រះបរមនាថ នរោត្តម សីហមុនី និង​សម្តេច​ព្រះមហាក្សត្រី នរោត្តម មុនីនាថ ​សីហនុ និងថ្នាក់ដឹកនាំកំពូលកម្ពុជា ជូនចំពោះ​ឯកឧត្តម​ប្រធានាធិបតី និងថ្នាក់ដឹកនាំកំពូល នៃសាធារណរដ្ឋរវ៉ាន់ដា ហើយសម្តេចបាន​ប្រសិទ្ធ​ពរ​ជូន​ទូតរវ៉ាន់ដាថ្មី និងសហការី សូមមានសុខភាពល្អ និងទទួលបាន​ជោគជ័យ​ក្នុង​ការ​បំពេញ​បេសក​កម្ម​ការទូត ដ៏ឧត្តុង្គឧត្តមនៅកម្ពុជា៕ អត្ថបទ៖ បាន សុខរិទ្ធិ