ប្រធានាធិបតីប្រទេសវេណេស៊ុយអេឡា លោក Nicolas Maduro កាលពីថ្ងៃអង្គារ បានអរគុណ ចំពោះការគាំទ្រដែលលោកទទួលបានពីថ្នាក់មូលដ្ឋានរបស់គណបក្សសង្គមនិយមរួបរួមរបស់ប្រទេសវ៉េណេស៊ុយអេឡា (PSUV) ដែលកំពុងកាន់អំណាច សម្រាប់បេក្ខភាពរបស់លោក នៅក្នុងការបោះឆ្នោត ប្រធានាធិបតីនាពេលខាងមុខ ដែលគ្រោងធ្វើឡើងនៅថ្ងៃទី ២៨ ខែកក្កដា។

លោក Maduro បានបង្ហោះនៅលើវេទិកាប្រព័ន្ធផ្សព្វផ្សាយសង្គម X ថា ការជួបប្រជុំមន្ត្រីនៅថ្នាក់ មូលដ្ឋាន ជាង ៣០០.០០០ កន្លែង មានការចូលរួមពីសមាជិកគណបក្សសង្គមនិយម រួបរួម របស់ប្រទេសវ៉េណេស៊ុយអេឡា (PSUV) ជាង ៤,២ លាននាក់ បានតែងតាំងលោក សម្រាប់ ការបោះឆ្នោតប្រធានាធិបតីបន្ទាប់។

លោកបាននិយាយថា លោកនឹងរង់ចាំរហូតដល់សមាជធំរបស់គណបក្សសង្គមនិយមរួបរួមរបស់ ប្រទេសវ៉េណេស៊ុយអេឡា (PSUV) ដែលគ្រោងធ្វើនៅថ្ងៃសុក្រ ដើម្បីធ្វើឲ្យបេក្ខភាពរបស់លោក សម្រាប់ ការបោះឆ្នោតថ្មីក្លាយជាផ្លូវការ។ ទន្ទឹមនឹងនេះ គណបក្ស Podemos ដែលជាផ្នែកនៃ គណបក្សចម្រុះ កំពុងកាន់អំណាចបានប្រកាសគាំទ្ររបស់ខ្លួន ចំពោះការបំណងបោះឆ្នោតថ្មីរបស់លោក Maduro កាលពីចុងសប្តាហ៍។ ប្រធានគណបក្ស Podemos លោក Didalco Bolivar បាននិយាយថា ពួកគេ បានសម្រេចក្នុងនាមជាគណបក្សអម ដើម្បីគាំទ្រប្រធានាធិបតី លោក Nicolas Maduro ជាបេក្ខជន ហើយនឹងផ្តល់សច្ចាប័នលើសេចក្តីសម្រេចនេះ នៅថ្ងៃសុក្រ។

យោងតាមកាលវិភាគសម្រាប់បោះឆ្នោតដែលបង្កើតឡើងដោយក្រុមប្រឹក្សាជាតិរៀបចំការបោះឆ្នោត របស់ប្រទេសវ៉េណេស៊ុយអេឡា បានឲ្យដឹងថា បេក្ខជនទាំងអស់ ត្រូវចុះឈ្មោះនៅចន្លោះថ្ងៃទី ២១ ដល់ថ្ងៃទី ២៥ ខែមីនា ។