ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីក្រសួងការពារជាតិកម្ពុជា បានបន្តអំពាវនាវដល់ភាគីពាក់ព័ន្ធទាំងអស់ ជាពិសេសក្រុមគ្រូពេទ្យយោធា ត្រូវធ្វើការរួមគ្នា​ឲ្យកាន់​តែស្អិតរមួតបន្ថែមទៀត ក្នុងការទប់ស្កាត់ និងបង្ការនូវជំងឺកូវីដ១៩ ខណៈជំងឺដ៏កាចសាហាវមួយនេះ បាន​កំពុងយាយីយ៉ាងខ្លាំងនៅប្រទេសកម្ពុជា រហូត​បានធ្វើឲ្យបងប្អូនប្រជាពលរដ្ឋបាត់បង់ជីវិត រាប់រយនាក់ក្នុងរយៈពេលប៉ុន្មានខែមកនេះ។

ថ្លែងតាមរយៈសាអេឡិចត្រូនិច(តេលេក្រាម) កាលពីយប់ថ្ងៃទី១៤ ខែកក្កដា ឆ្នាំ២០២១នេះ សម្តេចពិជ័យសេនាទៀ បាញ់ បានលើកឡើងថា នាពេលបច្ចុប្បន្ននេះ ទាំងពិភពលោកក៏ដូចជា​ប្រទេស​​កម្ពុជា​យើងទាំងមូលបានកំពុងផ្ទុះឡើងយ៉ាងខ្លាំងនូវជំងឺកូវីដ១៩នេះ ដូច្នេះក្នុងនាមយើង​ជាក្រុម​គ្រូពេទ្យ គប្បី​​ត្រូវបង្កើនសកម្មភាពរួមគ្នាបន្ថែមទៀតជួយដល់បងប្អូនប្រជាពលរដ្ឋខ្មែរ ដោយ​ត្រូវ​បន្តធ្វើការចាក់វ៉ាក់សាំងជូនពួកគាត់ឲ្យបានឆាប់រហ័ស​ស្របទៅតាមគោលដៅ​ដែល​រាជ​រដ្ឋា​ភិបាល​បាន​ដាក់ជាបន្តបន្ទាប់នោះ។

សម្តេចពិជ័យសេនា ទៀ បាញ់បានបញ្ជាក់ថា​«យើងត្រូវតែរួមគ្នាធ្វើសង្រ្គាម​ជាមួយ​ជំងឺកូវីដ១៩នេះ​ទាំងនេះ សុទ្ធ​ជា​បញ្ហា​ដែលយើងបានឃើញទាំងអស់គ្នាហើយ ដូច្នេះយើងត្រូវតែបំពេញ​ដោយ​ភាព​ស្មោះស្ម័គ្រ ត្រូវយកចិត្តទុកដាក់ និងបង្កើនការទទួលខុសត្រូវខ្ពង់ខ្ពស់បំផុតពីគ្រប់​កន្លែងទាំងអស់​ឲ្យ​បានដិតដល់ព្រមៗគ្នា ដើម្បីឲ្យក្លាយទៅជាកម្លាំងមួយនាំវ៉ាក់សាំងរបស់យើងយកទៅ​បញ្ជ្រាប​ នូវរាំង​​​កាយ​​មនុស្ស​ឲ្យបាន​មួយ​ចំនួនណា ស្របទៅតាមគោលការណ៍​ដែល​រាជរដ្ឋាភិបាល​បាន​ដាក់​ចេញនោះ»។

ជាមួយគ្នានោះដែរ សម្តេចពិជ័យសេនាទៀ បាញ់ ក៏បានក្រើនរំលឹកដល់ក្រុមគ្រូពេទ្យទាំងអស់មិន​ត្រូវ​យកកម្រៃ​ពីបងប្អូនប្រជាពលរដ្ឋនោះឡើយ​ពេលដែលធ្វើការចាក់វ៉ាក់សាំង​ជូនបងប្អូន​ប្រជា​ពលរដ្ឋនោះ ខណៈពេលនេះ​គឺជាពេលដែលយើងត្រូវ​សាមគ្គីគ្នាជួយ​ស្រោចស្រង់​អាយុជីវិត​របស់​បងប្អូន​ពលរដ្ឋខ្មែរ ដែល​ពួកគាត់​កំពុងមានទុក្ខធុរៈយ៉ាងខ្លាំង​ដោយសារតែបញ្ហា​មេរោគ​កូវីដ១៩នេះ។

សូមបញ្ជាក់ថា គិតត្រឹមថ្ងៃទី១៤ ខែកក្កដា ឆ្នាំ២០២១ ដំណើរការចាក់វ៉ាក់សាំងកូវីដ-១៩ របស់​ក្រុមគ្រូពេទ្យ​ក្រសួងការពារជាតិ សម្រេចបានចំនួនសរុប ២,១៨៤,៩២៧នាក់ហើយ ខណៈយុទ្ធនាការនេះ បានកំពុងបន្តទៀតនៅតាមបណ្តាខេត្តនានា​ ស្របទៅតាមគោលដៅរបស់ប្រមុខរាជរដ្ឋាភិបាលនោះ៕

អត្ថបទ ៖ បាន ចក់