បន្ទាយមានជ័យ ៖ នៅថ្ងៃទី១៩ ខែមីនា ឆ្នាំ២០២៤ គណៈកម្មាធិការបណ្តុះបណ្តាលខេត្តបន្ទាយមានជ័យ បានបើកវគ្គ បណ្តុះបណ្តាលស្តីពី “វឌ្ឍភាពការងារសម្រេចបានត្រីមាសទី១ ឆ្នាំ២០២៤ និងលើកទិសដៅការងារបន្តសម្រាប់សិស្សTVET ១.៥លាននាក់”ដែលជាកម្មវិធីដ៏មានសារៈសំខាន់ក្នុងចំណោម កម្មវិធីគោលនយោបាយអាទិភាពទាំង៦ ដែលរាជរដ្ឋាភិបាលបានប្រកាសដាក់ឱ្យអនុវត្ត ជូនដល់អ្នកពាក់ព័ន្ធ។

ឯកឧត្តម អ៊ុ រាត្រី អភិបាលខេត្ត និងជាប្រធានគណៈកម្មាធិការបណ្តុះបណ្តាលខេត្ត មានប្រសាសន៍ថា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា បានគិតគូយកចិត្តទុកដាក់ទៅលើយុវជន ដែកជាសិស្ស និស្សិតមកពីគ្រួសារក្រីក្រ ងាយរងហាយនីភ័យ មានឱកាសសិក្សាយកជំនាញមួយពិតប្រាកដ ដោយគ្មានឥតគិតថ្លៃ ដោយបានដាក់ឱ្យអនុវត្តនូវ «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ»។ 

ឯកឧត្តម បន្តថា កម្មវិធីនេះបានធ្វើដំណើរស្របគ្នាជាមួយយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ ដែលមានគោលដៅរួមគឺ ទី១-ការផ្តល់នូវជំនាញ ដើម្បីទទួលបាននូវការងារសមរម្យ និងការប្រកបមុខរបរដោយខ្លួនឯង សំដៅរួមចំណែកក្នុងការកាត់បន្ថយភាពក្រីក្រ និងវិសមភាពសេដ្ឋកិច្ច, ទី២-ការពង្រឹងភាពធន់នៃសេដ្ឋកិច្ចសង្គម ជាពិសេសប្រជាពលរដ្ឋក្រីក្រដែលងាយរងផលប៉ះពាល់ដោយសារជំងឺកូវីដ និងវិបត្តិសេដ្ឋកិច្ចសកល និង ទី៣-ការបង្កើនលទ្ធភាពឈានចូលសេដ្ឋកិច្ចក្នុងប្រព័ន្ធ ហើយក្លាយជាចលករដ៏សំខាន់ដែលអាចរួមចំណែកឈានទៅសម្រេចបាននូវការអភិវឌ្ឍប្រទេសប្រកបដោយចីរភាព។ 

លោកស្រី សំរិទ្ធ សូរ្យជាតិ នាយិការវិទ្យាស្ថានពហុបច្ចេកទេសខេត្ត និងជាប្រធានលេខាធិការដ្ឋានគណៈកម្មាធិការបណ្តុះបណ្តាលខេត្ត បានឱ្យដឹងថា លទ្ធផលសម្រេចបានរបស់គណៈកម្មាធិការបណ្តុះបណ្តាលខេត្ត (PTB) និងលេខាធិការដ្ឋាន បច្ចុប្បន្ននេះគ្រឹះស្ថានអប់រំបណ្តុះបណ្តាលវិជ្ជាជីវ(អ.ប.វ) មានសិស្សកំពុងសិក្សាសរុបចំនួន៤៥២នាក់/ស្រី១៦០ នាក់ក្នុងនោះមានសិស្សមកពីគ្រួសារក្រីក្រ១/២និងប័ណ្ណរងហានិភ័យចំនួន២៣៧នាក់/ស្រី១១១នាក់៕ អត្ថបទ រឿង ចន្ទ្រា