ក្រសួងអប់រំ យុវជន និងកីឡា រួមទាំងក្រុមអ្នកជំនាញក្នុងវិស័យអប់រំនៅកម្ពុជា នៅថ្ងៃទី ២០ និង​ថ្ងៃទី ២១ ខែមីនា ឆ្នាំ ២០២៤នេះ បានជួបជុំគ្នាដើម្បីពិភាក្សាលើ ដំណើរឆ្ពោះទៅ​ការ​ត្រៀមខ្លួន​របស់​សាលា​រៀននាពេលអនាគត ដើម្បីកសាងភាពធន់ និងធានាគុណភាពអប់រំ។

ក្រសួងអប់រំ យុវជន និងកីឡា រួមទាំងវិទ្យាស្ថានបណ្ដុះបណ្ដាល និង​ស្រាវជ្រាវ ដើម្បី​អភិវឌ្ឍន៍​កម្ពុជា​ ដោយមានការចូលរួមអ្នកជំនាញក្នុងវិស័យអប់រំជាច្រើនរូបនៅកម្ពុជា បានរៀប​ចំ​ជា​សន្និសីទ​គោល​នយោបាយអប់រំលើកទី៤ ស្ដីពី « ដំណើរឆ្ពោះទៅ​ការ​ត្រៀមខ្លួន​របស់​សាលា​រៀន​នា​ពេល​​អនាគត ដើម្បីកសាងភាពធន់ និងធានាគុណភាពអប់រំ»។

ក្នុងការ​បើកកម្មវិធីនេះ ឯកឧត្តម ឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និង​កីឡា បានលើកឡើងជាការគាំទ្រចំពោះការរៀបចំឱ្យមានកិច្ចពិភាក្សានេះឡើង។ ឯកឧត្តម​បន្ត​ថា នេះជាកិច្ចសហប្រតិបត្តិការរវាងក្រសួងអប់រំ ជាមួយ​នឹង​អ្នក​ជំនាញ​នៃ​វិទ្យាស្ថាន​បណ្ដុះ​បណ្ដាល និង​ស្រាវជ្រាវដើម្បីអភិវឌ្ឍន៍កម្ពុជា ដើម្បីពិភាក្សាទៅលើគំនិតផ្ដួចផ្ដើមមួយចំនួន ពិសេស​លើ​ចំណុចគន្លឹះដើម្បីរៀបចំកែលម្អក្នុងការអនុវត្តកំណែទម្រង់ក្នុងវិស័យអប់រំ។

ក្នុងកម្មវិធីដដែលនេះ លោកស្រី អេង នេត្រា នាយកប្រតិបត្តិ នៃវិទ្យាស្ថាន​បណ្ដុះបណ្ដាល និង​ស្រាវជ្រាវ ដើម្បី​អភិវឌ្ឍន៍កម្ពុជា លើកឡើងដែរថា កម្មវិធីនេះ ជាការបង្កើតឱកាស​ឱ្យ​ភាគី​ពាក់ព័ន្ធ​សំខាន់​បាន​ចូលរួមចំណែក និងពិភាក្សាលើវឌ្ឍនភាពនៃវិស័យអប់រំ ក៏ដូចជាស្វែង​រក​គំនិត​ថ្មីៗ​បន្ថែម​ទៀត ដើម្បីដោះស្រាយបញ្ហាប្រឈមដែលកំពុងកើតមានឡើង។

សម្រាប់ក​ម្មវិធីរយៈពេលពីរថ្ងៃនេះ គឺមានកិច្ចពិភាក្សាធំៗចំនួន ៤។ កិច្ចពិភាក្សាទី ១ គឺផ្តោតលើ ភាព​ជា​អ្នកដឹកនាំ និងអភិបាលកិច្ចសាលារៀនល្អ ដើម្បីលើកកម្ពស់លទ្ធផលសិក្សារបស់សិស្ស។ កិច្ច​ពិភាក្សាទី ២ផ្តោតលើ ការអភិវឌ្ឍន៍វិជ្ជាជីវៈជាប្រចាំ តាមរយៈការបង្វឹក និងប្រឹក្សាយោបល់ រីឯ​កិច្ច​ពិភាក្សាទី ៣ផ្តោតលើ តើបច្ចេកវិទ្យាជួយកាត់បន្ថយឬបង្កើនគម្លាត? តើយើង​ត្រូវ​ធ្វើ​ដូច​ម្ដេច​ដើម្បី​ប្រើប្រាស់​បច្ចេកវិទ្យាឱ្យបានប្រសើរជាងមុនក្នុងការលើកកម្ពស់ការសិក្សា? ចំពោះ​កិច្ច​ពិភាក្សា​ទី ៤ គឺក្រុមអ្នកជំនាញផ្តោតលើ ឧត្តមានុវត្តន៍ នៃភាពជាដៃគូសាធារណៈ និង​សហគមន៍​៕​ អត្ថបទ៖ គឹមហុក