សហភាពអឺរ៉ុប កាន់តែខិតជិតដល់ការពង្រីកការគាំទ្រផ្នែកពាណិជ្ជកម្មសម្រាប់អ៊ុយក្រែនរយៈពេលមួយឆ្នាំទៀត ខណៈពេលដែលបង្កើតការការពារកាន់តែរឹងមាំ ដើម្បីទប់ស្កាត់ការនាំចូលផលិតផលមួយចំនួន មិនឲ្យឡើងខ្ពស់ពេក។

សេចក្តីថ្លែងការណ៍មួយបានឲ្យដឹងថា តំណាងរដ្ឋាភិបាលសហភាពអឺរ៉ុប និងសភារបស់ប្លុកនេះ បានឈានដល់កិច្ចព្រមព្រៀងបណ្តោះអាសន្នមួយ នៅព្រឹកថ្ងៃពុធនេះ ដើម្បីបន្តការផ្អាកពន្ធនាំចូល និងកូតាលើការនាំចេញរបស់អ៊ុយក្រែនទៅកាន់សហភាពអឺរ៉ុប រហូតដល់ខែមិថុនា ឆ្នាំ២០២៥។ វិធានការពាណិជ្ជកម្មមានគោលបំណងគាំទ្រអ៊ុយក្រែន ចាប់តាំងពីការចាប់ផ្តើមនៃការឈ្លានពានរបស់រុស្ស៊ី ដោយសារវិ ស័យកសិកម្ម គឺជាផ្នែកដ៏សំខាន់នៃសេដ្ឋកិច្ចរបស់ខ្លួន ហើយកំពង់ផែមួយចំនួន នៅតែត្រូវបានរារាំងដោយ សង្រ្គាម។

ទោះបីជាយ៉ាងណាក៏ដោយ សហភាពអឺរ៉ុប បានបង្កើនការការពារសម្រាប់ផលិតផលកសិកម្មដែលងាយរងគ្រោះដូចជាស្ករ ពោត ស៊ុត និងបសុបក្សី ដែលអនុញ្ញាតឲ្យចាប់ផ្តើមយកពន្ធ ប្រសិនបើលំហូរចូលលើសពីមធ្យមភាគក្នុងរយៈពេលពីរឆ្នាំចុងក្រោយនេះ។

ការនាំចូលកសិផលពីអ៊ុយក្រែន បានក្លាយជាចំណុចស្នូលនៃការតវ៉ារបស់កសិករ ដែលបានវាយលុកអឺរ៉ុបក្នុងរយៈពេលប៉ុន្មានខែថ្មីៗនេះ រួមជាមួយនឹងការកើនឡើងថ្លៃដើម និងបន្ទុករដ្ឋបាល។ កាលពីខែមុន កសិករ បានស្នើទៅសភាអឺរ៉ុបឲ្យដាក់កម្រិតវិធានការពាណិជ្ជកម្មសេរី ដោយនិយាយថា ពួកគេបង្កគ្រោះថ្នាក់ដល់សេដ្ឋកិច្ចរបស់ប្លុក និងរំខានដល់ទីផ្សារតែមួយនេះ។

កសិករប៉ូឡូញ បានស្ថិតក្នុងចំណោមសំឡេងខ្លាំងបំផុតហើយដើមសប្តាហ៍នេះ បានចាប់ផ្តើមបិទផ្លូវហាយវ៉េសំខាន់មួយ នៅជិតព្រំដែនអាល្លឺម៉ង់។

សំណើនេះ ត្រូវតែត្រូវបានអនុម័តដោយសភាអឺរ៉ុប និងរដ្ឋជាសមាជិក មុនពេលចូលជាធរមាន។