ប្រណាំង​កង់៖ ​​អ្នកការពារ​តំណែង​ជើងឯក កីឡាករ​ស្លូ​វេ​នី Tadej Pogacar បាន​បន្ត​ប្រជែង​ឈ្នះ​ដំណាក់កាល​ទី ១៨ នៃ​ការប្រកួតប្រណាំង​កង់​ព្រឹត្តិការណ៍ Grand Tour, Tour de France នៅ​ថ្ងៃ​ព្រហស្បតិ៍​ម្សិលមិញ និង​បន្ត​ការ​នាំមុខ​ក្នុង​តារាង​រួម ​ខណៈ​ការប្រកួត​នឹង​បញ្ចប់​នៅ​ថ្ងៃអាទិត្យ​នេះ​។​

​ដំណាក់កាល​ទី ១៨ ដែលមាន​ចម្ងាយ​ផ្លូវ ១២៩.៧​គីឡូម៉ែត្រ ដែលជា​ដំណាក់កាល​ឆ្លងកាត់​ស្ថានភាព​ផ្លូវ​ភ្នំ​នោះ Tadej Pogacar បានមក​ដល់ទី​ព្រ័ត្រ​មុនគេ​ប្រើពេល ៣ម៉ោង ៣៣នាទី ៤៥វិនាទី តាម​ពីក្រោយ​ដោយ​កីឡាករ​ដា​ណឺ​ម៉ាក Jonas Vingegaard យឺត​ជាង ២វិនាទី និង​លេខ៣ កីឡាករ​អេ​ក្វា​ដ័​រ Richard Carapaz តាម​ពីក្រោយ ២វិនាទី​ដូចគ្នា​។ ​​នេះ​ជា​ជ័យជំនះ​ ២​ដំណាក់កាល​ផ្ទួនៗ​សំរាប់ Tadej Pogacar និង​ធ្វើឱ្យ​កីឡាករ​របស់​ក្រុម UAE Team Emirate រូបនេះ​ពន្លាត​ការ​នាំមុខ​ក្នុង​តារាង​វេលា​រួម​សរុប ៥នាទី ៤៥វិនាទី ពីលើ​គូប្រជែង​ដែល​កំពុង​ដេញ​ពីក្រោយ​កីឡាករ​ដា​ណឺ​ម៉ាក Jonas Vingegaard ខណៈ​លេខ៣ នៅតែ​ជា Richard Carapaz ដដែល​។

​​កីឡាករ​វ័យ ២២ឆ្នាំ Tadej Pogacar រំពឹងថា​នឹង​អាច​រកបាន​ជ័យជំនះ​ដំណាក់កាល​សំខាន់​នៅ​ថ្ងៃ​សៅរ៍​បាន ​ដែលជា​ដំណាក់កាល​ប្រណាំង​យក​ថេរវេលា​ផ្ទាល់ខ្លួន ដើម្បី​អាច​ការពារ​តំណែង​ជើងឯក Tour de France​។​ ​ដោយឡែក​សំរាប់​ដំណាក់កាល​ទី ១៩ ថ្ងៃ​សុក្រ​នេះ​មាន​ចម្ងាយ​ផ្លូវ ២០៧​គីឡូម៉ែត្រ ជា​ដំណាក់កាល​ប្រណាំង​លើ​ស្ថាន​​ភាព​ផ្លូវ​រាបស្មើ​ធម្មតា​៕

​អត្ថបទ​៖​នាង សុភា​វុ​ធ