បេក្ខជនចាញ់ឆ្នោតប្រធានាធិបតីឥណ្ឌូនេស៊ីលោក Anies Baswedan បានដាក់ពាក្យប្ដឹងនៅតុលាការធម្មនុញ្ញ នៅថ្ងៃព្រហស្បតិ៍ (ទី២១ ខែមីនា) ដើម្បីប្រឆាំងនឹងលទ្ធផលនៃការបោះឆ្នោត ដែលរដ្ឋមន្ត្រីការពារជាតិលោក Prabowo Subianto ទទួលជ័យជម្នះក្នុងសំឡេងយ៉ាងច្រើនលើសលប់។

លោក Anies ដែលជាអតីតអភិបាលក្រុងហ្សាការតាបាននិយាយថា គោលបំណងនៃបណ្ដឹងនេះ គឺដើម្បីធានាឲ្យលទ្ធិប្រជាធិបតេយ្យមានភាពល្អប្រសើរឡើង ហើយបាននិយាយថា ការបោះឆ្នោតមានបញ្ហាជាច្រើនដែលចាំបាច់ត្រូវកែតម្រូវ។

លោក Anies បានបដិសេធមិនទទួលស្គាល់បរាជ័យនោះឡើយបន្ទាប់ពីលទ្ធផលត្រូវបានចេញផ្សាយ កាលពីថ្ងៃពុធ (ទី២០ ខែមីនា) ហើយក្រុមរបស់លោកបានចោទប្រកាន់ថា រដ្ឋបាលបច្ចុប្បន្នបានស្វែងរកដោយអយុត្តិធម៌ ដើម្បីមានឥទ្ធិពលលើការប្រកួតប្រជែងនេះ ដែលការលើកឡើងនេះត្រូវបានអាជ្ញាធរបដិសេធ។

គួរបញ្ជាក់ថា លទ្ធផលផ្លូវការបានបង្ហាញថា អតីតមេបញ្ជាការកងកម្លាំងពិសេសលោក Prabowo Subianto ដែលត្រូវបានគាំទ្រយ៉ាងស្ងៀមស្ងាត់ដោយប្រធានាធិបតីក្នុងអំណាចដ៏មានប្រជាប្រិយ គឺលោក Joko Widodo បានឈ្នះស្ទើរតែ ៦០ភាគរយនៃការបោះឆ្នោតនេះ តាមពីក្រោយដោយលោក Anie ទទួលបានសំឡេង ២៥ភាគរយ និងអតីតអភិបាលខេត្ត Central Java (ជ្វាកណ្ដាល) លោក Ganjar Pranowo មានសំឡេងគាំទ្រ ១៦ភាគរយ។

យ៉ាងណាក្ដី ពាក់ព័ន្ធនឹងការបោះឆ្នោតនេះ នៅឯសន្និសីទសារព័ត៌មាន លោក Anies បានប្រាប់ថា៖ «ដំណើរការ និងលទ្ធផល គឺសំខាន់ដូចគ្នា។ នៅពេលដែលដំណើរការមានបញ្ហានោះ លទ្ធផលក៏មានបញ្ហាដែរ។ រាប់ចាប់ពីទិដ្ឋភាពគោលនយោបាយ បទប្បញ្ញត្តិ រហូតដល់ការអនុវត្ត (ការបោះឆ្នោត) មានបញ្ហាជាច្រើន ហើយយើងចង់ឲ្យមានការកែតម្រូវ ដើម្បីកុំឲ្យបញ្ហានេះកើតឡើងម្តងទៀត»៕