ពោធិ៍សាត់៖ កម្លាំងចម្រុះនៅថ្ងៃព្រហស្បតិ៍ ទី២១ ខែមីនា ឆ្នាំ២០២៤ បាន​បន្ត​សកម្ម​ភាព​បង្រ្កាប​ទប់ស្កាត់បទ​ល្មើសធនធានធម្មជាតិ នៅខេត្តពោធិ៍សាត់ បានសម្រេច- ឃ្លុំដីទុកជាសម្បត្តិរដ្ឋបាន ១.៤៥៤,៨៤ហិកតា និងបានឃាត់ខ្លួនមនុស្សចំនួន០១ នាក់ និង​កសាង​សំណុំ​រឿង​៣ករ​ណី​ផ្សេង​ទៀត​បញ្ជូនទៅតុលាការ។

ក្នុងប្រតិបត្តិការដ៏ក្តៅគគុកនៅក្នុងថ្ងៃដដែល កម្លាំងចម្រុះ បានដកហូតម៉ាស៊ីនហាន់ដំឡូងមី ១គ្រឿង, រណារយន្តតូច ៥គ្រឿង, កាំភ្លើងកែឆ្នៃ ៣ដើម, កាំបិតកកុក ៣គ្រឿង, រណាដៃ ១គ្រឿង និងឧបករណ៍ឆក់ត្រី ១គ្រឿង។ លើសពិនេះ ក្រុមសមត្ថកិច្ច បានរឹប​អូស​វត្ថុតាង​នៅ​ហ្នឹង​កន្លែង​រួម​មានខ្ទមបណ្តោះអសន្នចំនួន ៣៩, ម៉ាស៊ីនបាញ់ថ្នាំ ២គ្រឿង, ដើមដំឡូងមី ១.១១០​បាច់, ដើមចេក ២៣៧គុម្ព, ដើមក្រូច ១០០០ដើម, បង្គោលរបងថ្ម ១២ដើម និង​បង្គោល​របង​ឈើ ២២៥ដើម។ 

សូមបញ្ជាក់ថា កិច្ចអន្តរាគមន៍បង្រ្កាបទប់ស្កាត់បទល្មើស លួចកាប់ រុករានដី នៅ​ក្នុង​តំបន់​ការពារ​ធម្មជាតិ យកធ្វើជាកម្មសិទ្ធិ បានចូលរួមពីកម្លាំងចម្រុះចំនួន៧៨៩នាក់ រួមមាន​កង​រាជ​អាវុធ​ហត្ថ​លើ​ផ្ទៃ​ប្រទេស កងកម្លាំងនគរបាលជាតិ កងកម្លាំងនៃគណៈបញ្ជាការកងឯកភាពខេត្ត រដ្ឋបាល​មូលដ្ឋានគ្រប់ថ្នាក់នៅក្នុងខេត្តពោធិ៍សាត់ រួមជាមួយថ្នាក់ដឹកនាំ មន្រ្តីជំនាញ និងមន្រ្តីឧទ្យានុរក្ស នៃ​ក្រសួងបរិស្ថាន ដើម្បីអនវត្តតាមបទបញ្ជារបស់រាជរដ្ឋាភិបាល ឱ្យក្រសួងបរិស្ថាន ក្រសួង ស្ថាប័ន និងកម្លាំងសមត្ថកិច្ចពាក់ព័ន្ធ បន្តពង្រឹងការគ្រប់គ្រងធនធានធម្មជាតិនិងព្រៃឈើ និងត្រូវ​បន្ត​ទប់ស្កាត់ ការកាប់បំផ្លាញព្រៃឈើ នៅគ្រប់ទីកន្លែងទូទាំងប្រទេស៕