ភ្នំពេញ៖ អំឡុងពេលចូលរួមកិច្ចប្រជុំរយៈពេល ៤សប្ដាហ៍ ដែលរៀបចំធ្វើពីថ្ងៃទី២១ ខែមិថុនា ដល់ថ្ងៃទី១៤ ខែកក្កដា ឆ្នាំ២០២១ ស្ថាន​បេស​កកម្មអចិន្ត្រៃយ៍កម្ពុជា ប្រចាំអង្គការសហប្រជាជាតិ នៅហ្សឺណែវ បានចូលរួមថ្លែងបទអន្តរាគមន៍ចំនួន១៧លើក ដោយបានលើក​បង្ហាញ​​​អំពីសមិទ្ធផល និងវឌ្ឍនភាពក្នុងទិដ្ឋភាពច្បាប់ គោលនយោបាយ និងការអនុវត្តជាក់ស្តែងនានារបស់កម្ពុជា ក្នុងវិស័យ​សិទ្ធិ​មនុ​ស្ស​។

ក្នុងអំឡុងនៃកិច្ចប្រជុំនោះ កម្ពុជា ក៏បានលើកឡើងអំពីស្ថានភាពនៃការគ្រប់គ្រងការរាលដាលនៃជំងឺ កូវីដ១៩នៅកម្ពុជាផងដែរ។ កម្ពុជា​បញ្ជាក់បន្ថែមថា ក្នុងអំឡុងពេលនៃវិបត្តិកូវីដ១៩ គ្មាននរណាម្នាក់អាចមានសុវត្ថិភាពបានទេ លុះត្រាតែមនុស្សគ្រប់​គ្នាមាន​សុវត្ថិភាព។ វ៉ាក់សាំងកូវីដ១៩ ត្រូវតែជាទំនិ ញសាធារណៈសកល ដែលត្រូវចែកចាយក្នុងស្មារតីមនុស្សធម៌ដល់ប្រទេសទាំងអស់។

កម្មវិធីចាក់វ៉ាក់សាំងថ្នាក់ជាតិដោយឥតគិតថ្លៃនៅកម្ពុជា រួមទាំងសម្រាប់ជនបរទេសផងដែរនោះ សម្រេចបានជាង ៥២% នៃប្រជាជន​គោល​ដៅ​(គិតត្រឹមថ្ងៃទី១៤ ខែកក្កដា ឆ្នាំ២០២១)។

ដើម្បីទ្រទ្រង់ដល់ជីវភាពគ្រួសារដែលរងគ្រោះខ្លាំងបំផុត រាជរដ្ឋាភិបាលកម្ពុជាបានដាក់ចេញកម្មវិធី​ផ្ទេរសាច់​ប្រាក់​សម្រាប់​គ្រួសារ​ក្រី​ក្រ​​តាមរយៈប្រព័ន្ធឌីជីថល ដោយផ្អែកលើគោលការណ៍សមធម៌ សមភាព និងប្រសិទ្ធភាព។ កញ្ចប់គាំពារសង្គមជាច្រើនទៀតកំពុងតែត្រូវបានអនុវត្ត ដើម្បីជួយសម្រួលដល់គ្រួសារដែលរងផលប៉ះពាល់។ ប្រភពដដែលបន្ថែមថា នៅកម្ពុជាអ្នកជួញដូរគ្រឿងញៀនត្រូវប្រឈមនឹងបទចោទ ប៉ុន្តែមិនត្រូវបានផ្តន្ទាទោសប្រហារជីវិតនោះទេ។ អ្នកប្រើប្រាស់គ្រឿងញៀនគឺជាជនរងគ្រោះ ដែលអាចទទួលបានការព្យាបាល ការប្រឹក្សាយោបល់ផ្លូវចិត្ត និងការបណ្តុះបណ្តាល​វិជ្ជា​ជីវៈ​ ដោយស្ម័គ្រចិត្តនៅមជ្ឈមណ្ឌល បន្សាប និងស្តារនីតិសម្បទា និងនៅមណ្ឌលសុខភាព។ ប្រភពដដែលបន្តថា ការ​ធ្វើបាតុ​កម្ម​ខុស​ច្បាប់ ឬបាតុកម្មស៊ីឈ្នួលដែលដាក់សម្ពាធលើប្រព័ន្ធតុលាការ ឬរំខានដល់សណ្តាប់ធ្នាប់សាធារណៈ ពុំមែនជាការអនុវត្ត​សិទ្ធិសេរីភាព​ប្រមូល​ផ្តុំដោយសន្តិវិធី ដូចមានចែងក្នុងរដ្ឋធម្មនុញ្ញឡើយ។

ប្រភពដដែលបន្ថែមថា មេរោគកូរ៉ូណាវីរុសគឺជាជំងឺដ៏កាចសាហាវ ប៉ុន្តែព័ត៌មានក្លែងក្លាយ និងការផ្សាយព័ត៌មានមិនពិត ក៏បង្ក​គ្រោះ​ថ្នាក់​​​មិនចាញ់ជំងឺនេះដែរ។ ដើម្បីប្រឆាំងនឹងព័ត៌មានមិនពិត យើងត្រូវចេញផ្សាយនូវការពិត៕ ដោយ៖ គង់ ឌិន