បណ្ដាមេដឹកនាំជុំវិញពិភពលោកបានថ្កោលទោសយ៉ាងខ្លាំងចំពោះការវាយប្រហារភេរវកម្មនៅឯសាលប្រគំតន្ត្រីជាយទីក្រុងមូស្គូ(Moscow)កាលពីយប់ថ្ងៃសុក្រ២២មីនាសប្ដាហ៍មុន សម្លាប់​មនុស្ស​​ ១៤៣នាក់ ហើយបង្ហាញការអាណិតអាសូរ និងចូលរួម​រំលែក​ទុក្ខ​ដល់​ក្រុម​គ្រួសារ​ដែល​បាន​បាត់​បង់ជីវិត។

លោក Peter Stano ប្រធានអ្នកនាំពាក្យទទួលបន្ទុកកិច្ចការខាងក្រៅរបស់សហភាពអឺរ៉ុប បាន​និយាយនៅក្នុងសារបង្ហោះលើបណ្ដាញសង្គម X ថា សហភាព​អឺរ៉ុប​ពិត​ជា​តក់​ស្លត់​ខ្លាំង​បំផុត​ចំពោះ​សេចក្ដីរាយការណ៍នៃការវាយប្រហារេភេរវកម្មក្នុងសាលប្រគំតន្ត្រីក្នុងទីក្រុងមូស្គូ និង​បាន​ថ្កោល​ទោស​ការវាយប្រហារលើជនស៊ីវិល។

នៅក្នុងការសន្ទនាតាមទូរស័ព្ទ ប្រធានាធិបតីទួរគី លោក Recep Tayyip Erdogan បាន​បង្ហាញ​ទុក្ខ​សោក និងចូលរួមរំលែកទុក្ខយ៉ាងជ្រាលជ្រៅដល់ប្រធានាធិបតីរុស្ស៊ី លោក Vladimir Putin ចំពោះ​ការវាយប្រហារនេះ។

លោក​បាន​ថ្កោល​ទោស​យ៉ាងដាច់អហង្ការ​ចំពោះ​ទង្វើ​នៃ​អំពើ​ភេរវក​ម្ម​ប្រឆាំង​នឹង​ជន​ស៊ីវិល​ស្លូត​ត្រង់​ ហើយបាន​បង្ហាញ​ពីឆន្ទៈ​របស់​ទួរគី​ក្នុង​ការ​បង្កើន​កិច្ច​សហប្រតិបត្តិការ​ជាមួយ​រុស្ស៊ី​ប្រយុទ្ធ​ប្រឆាំង​នឹង​អំពើភេរវកម្ម។ 

នៅក្នុងសេចក្តីថ្លែងការណ៍មួយប្រធានាធិបតីអ៊ីតាលីលោក ហ្ស៊ឺជីអូ ម៉ាតារ៉េឡា (Sergio Mattarella) បាននិយាយថា ពិភព​លោក​ឈរ​ក្នុង​សាមគ្គីភាព​នៅ​ពី​ក្រោយ​ជន​រង​គ្រោះនៃ​ការ​វាយ​ប្រហារ ដោយអំពាវនាវឱ្យសហគមន៍អន្តរជាតិប្រយុទ្ធប្រឆាំងនឹងអំពើភេរវកម្មគ្រប់រូបភាព។

ប្រធានាធិបតីស៊ែរប៊ី លោក អាឡិចសាន់ដាវ៉ូស៊ីក (Aleksandar Vucic) បាន​ចូល​រួម​រំលែក​ទុក្ខ​យ៉ាង​ស្មោះស្ម័គ្រ​ចំពោះពលរដ្ឋ និងថ្នាក់ដឹកនាំរុស្ស៊ី ដោយសង្ឃឹមថា ភេរវករដែលបាន​ប្រព្រឹត្ត​អំពើ​ឃោរ​ឃៅដ៏​អាក្រក់បែបនេះ នឹងត្រូវបានកាត់ទោស។

រដ្ឋមន្ត្រីការបរទេសអង់គ្លេសលោក David Cameron បាននិយាយនៅ​ក្នុង​ការ​បង្ហោះ​នៅ​លើ​បណ្ដាញ​សង្គម X ថា អង់គ្លេសបានថ្កោលទោសក្នុងលក្ខខណ្ឌខ្លាំងបំផុត លើការវាយ​ប្រហារ​ភេរវកម្ម​ដ៏​សាហាវនៅសាលាប្រគំតន្ត្រី ក្រូកាស (Crocus)។ លោក​ក៏បាន​ចូលរួម​រំលែក​ទុក្ខ​យ៉ាង​ក្រៀមក្រំ​បំផុត​ដល់ក្រុមគ្រួសារជនរងគ្រោះផងដែរ។ បណ្ដាមេដឹកនាំមកពីប្រទេសអាឡឺម៉ង់ ស្លូវ៉ាគី ហូឡង់ ស្វីស ហ្ស៊កដានី អាហ្វហ្គានីស្ថាន អ៊ីរ៉ង់ និងប៉ាគីស្ថាន និងសហរដ្ឋអាមេរិក ស្ថិត​ក្នុង​ចំណោមប្រទេសដទៃទៀត ដែលបានថ្កោលទោសយ៉ាងខ្លាំងចំពោះការវាយប្រហារនេះ និង​រំលែក​ទុក្ខ​ចំពោះការបាត់បង់ជីវិតដ៏សោកសៅនេះ ៕