រដ្ឋបាលខេត្តកណ្តាលបានចាប់ផ្តើមរៀបចំតុបតែងតាំងភ្លើងពណ៌ ធ្វើសួនទឹក សម្អាតបរិស្ថាន នៅ​សួនច្បារ​មាត់ទន្លេក្រុងតាខ្មៅ ដើម្បីត្រៀមទទួលពលរដ្ឋ និងភ្ញៀវទេសចរជាតិ អន្តរជាតិ ចូលលេង​ល្បែង​កីឡា​កម្សាន្តបែបប្រពៃណីខ្មែរច្រើនប្រភេទ អមដោយការប្រគំតន្ត្រីបែបប្រពៃណីខ្មែរ ក្រោម​ដំណក់​ទឹក​ត្រជាក់ អបអរសាទពិធីបុណ្យចូលឆ្នាំថ្មី ប្រពៃណីខ្មែរ ឆ្នាំរោង ដែល​នឹង​ឈាន​ចូល​មក​ដល់​នៅថ្ងៃទី១៣ ខែមេសានេះ។

លោក ចាប វន្នី ប្រធានមន្ទីរព័ត៌មានខេត្តកណ្តាល ថ្លែងប្រាប់ BTV នៅថ្ងៃទី២៦ ខែមីនានេះថា នៅ​ក្នុង​អំឡុងពេលនេះ នៅតាមអនុគណៈកម្មការរៀបចំកម្ម​វិធី​សង្ក្រាន្ត​នីមួយៗ​របស់​ខេត្ត​កណ្តាល​ គឺបាននិងកំពុងញាប់ដៃជើង រៀបចំសួនតំបន់ត្រជាក់ កន្លែងលេងទឹក ធ្វើឆាកប្រគំតន្ត្រី ធ្វើកូម ប្រទីព ធ្វើសួនត្រជាក់ និងការហាត់សមនូវរបាំសិល្បៈកីឡាចម្រុះជាដើម ដើម្បីត្រៀម​ទទួល​ពលរដ្ឋ និងភ្ញៀវទេសចរ​ជាតិ​-អន្តរជាតិ។

លោក ធឹម សំអុល អនុប្រធានមន្ទីរវប្បធម៌ និងវិចិត្រសិល្បៈ ថ្លែងថា នៅពេលក្រុមការងារ​មន្ទីរ​វប្បធម៌ បាននិងកំពុងរៀបចំកូមបង្ហោះ ប្រទីពបណ្តែតទឹកប្រមាណជិត១០០០ប្រទីប រៀបចំ​គ្រោង​ឆ្អឹង​ឆាកលេងល្បែងប្រជាប្រិយ ប្រគំតន្ត្រី សម្ដែងសិល្បៈនានា ហើយនឹងយក​ទៅ​រៀបចំ​ដំឡើង​នៅសួនច្បារមាត់ទន្លេក្រុងតាខ្មៅ នៅពេលឆាប់ៗនេះ ដើម្បីឲ្យពលរដ្ឋ និងភ្ញៀវជាតិ​អន្តរជាតិ ទទួលបានការដើរកម្សាន្តជាបណ្តើរនៅមុនថ្ងៃកម្មវិធីសង្ក្រាន្តឈានចូលមកដល់។

សូមបញ្ជាក់ថាឆ្នាំនេះខេត្តកណ្តាលនឹងរៀបចំព្រឹត្តិការណ៍សង្ក្រាន្តអបអរសាទរពិធីបុណ្យចូលឆ្នាំថ្មីប្រពៃណីខ្មែរធំជាងគេ នៅសួនច្បារមាត់ទន្លេក្រុងតាខ្មៅ។ ក្រៅពីនេះ ឯកឧត្តម គង់ សោភ័ណ អភិបាល​ខេត្តកណ្តាល ក៏បានណែនាំ​ឲ្យ​រដ្ឋបាល​ក្រុងស្រុក​ទាំងអស់​រៀបចំ​កម្ម​វិធីសង្ក្រាន្ត​អបអរសាទរ​បុណ្យចូលឆ្នាំថ្មីប្រពៃណីជាតិខ្មែររបស់ខ្លួនតាមរមណីយដ្ឋានទេសចរណ៍ តំបន់​ប្រវត្តិ​សាស្ត្រ​វប្បធម៌ នៅតាមវត្ត និងតាមគោលដៅទេសចរណ៍នានា នៅក្នុងមូលដ្ឋានរបស់ខ្លួន ដើម្បី​ឲ្យ​ពលរដ្ឋ និងភ្ញៀវទេសចរជាតិអន្តរជាតិ ទទួលបានការ​កម្សាន្ត​សប្បាយ​បែប​ប្រពៃណីខ្មែរ​យើង​ទាំង​អស់គ្នា​៕ អត្ថបទ ស៊ុម សុខជា