អ៊ុយក្រែន ត្រូវការអត្ថប្រយោជន៍ខ្លះដែលខ្លួនអាចទទួលបាន ដើម្បីវាយបណ្តេញរុស្ស៊ីចេញពីទឹកដីរបស់    ខ្លួន។ ចំណុចភ្លឺដែលកំពុងលេចចេញមួយ គឺឧស្សាហកម្មការពារជាតិតូចមួយ ប៉ុន្តែរីកចម្រើនយ៉ាងឆាប់រហ័ស ដែលរដ្ឋាភិបាលកំពុងចំណាយប្រាក់យ៉ាងច្រើន ដោយសង្ឃឹមថា ការកើនឡើងនៃអាវុធ និងគ្រាប់រំសេវដែលផលិតក្នុងស្រុក អាចជួយដល់ការធ្វើសង្គ្រាមជាមួយរុស្ស៊ី។

កិច្ចខិតខំប្រឹងប្រែងនេះ បានកើនឡើងយ៉ាងខ្លាំងកាលពីឆ្នាំមុន ខណៈដែលសហរដ្ឋអាមេរិក និងអឺរ៉ុបមានភាពតានតឹងក្នុងការផ្តល់អាវុធ និងជំនួយផ្សេងទៀតដល់អ៊ុយក្រែនប្រឆាំងនឹងយោធារុស្ស៊ីដែលគាំទ្រដោយឧស្សាហកម្មការពារក្នុងស្រុក ដែលកំពុងរីកចម្រើន។

រដ្ឋាភិបាលអ៊ុយក្រែន បានចំណាយថវិកាជិត ១,៤ពាន់លានដុល្លារក្នុងឆ្នាំ ២០២៤ ដើម្បីទិញ និងផលិត អាវុធក្នុងស្រុក ដែលច្រើនជាងចំនួន២០ដង មុនពេលការឈ្លានពានពេញទំហឹងរបស់រុស្ស៊ី។

ចំណែកនៅក្នុងការផ្លាស់ប្តូរដ៏សំខាន់មួយផ្សេងទៀត សព្វាវុធដ៏ច្រើន ត្រូវបានទិញពីបណ្តារោងចក្រឯក    ជន។ ពួកគេកំពុងរីកដុះដាលពាសពេញប្រទេស ហើយបានកាន់កាប់ឧស្សាហកម្មមួយ ដែលត្រូវបានគ្រប់គ្រងដោយក្រុមហ៊ុនរបស់រដ្ឋយ៉ាងឆាប់រហ័ស។

រោងចក្រផលិតកាំភ្លើងត្បាល់មួយរបស់ឯកជន ដែលបានបើកដំណើរការនៅអ៊ុយក្រែនភាគខាងលិច កាលពីឆ្នាំមុន កំពុងផលិតគ្រាប់បានប្រហែល ២០.000គ្រាប់ ក្នុងមួយខែ។ លោក Anatolli Kuzmin ម្ចាស់រោងចក្រ វ័យ៦៤ឆ្នាំ ដែលធ្លាប់ផលិតឧបករណ៍កសិកម្ម ហើយបានភៀសខ្លួនចេញពីផ្ទះរបស់ខ្លួន នៅអ៊ុយ     ក្រែនភាគខាងត្បូង ក្រោយពីរុស្ស៊ីឈ្លានពានក្នុងឆ្នាំ២០២២ បាននិយាយថា៖«ខ្ញុំមានអារម្មណ៍ថា យើងកំពុងនាំប្រទេសរបស់យើងខិតទៅជិតជ័យជម្នះហើយ»។