ក្រុមការងារអង្គការសុខភាពពិភពលោក(WHO) បានជម្លៀសកុមារមានជំងឺធ្ងន់ធ្ងរ ២នាក់ ចេញពីមន្ទីរពេទ្យនៅតំបន់ខាងជើងហ្កាហ្សាដែលញាំញីដោយសារសង្រ្គាម ។

កុមារដែលទើបជម្លៀសចេញពីមន្ទីរពេទ្យ Kamal Adwan កាលពីថ្ងៃសៅរ៍ ត្រូវបានបញ្ជូនបន្តទៅកាន់មន្ទីរពេទ្យចល័តរបស់វេជ្ជសាស្រ្តអន្តរជាតិ នៅភាគខាងត្បូងតំបន់ហ្កាហ្សា ជាទីដែលពួកគេនឹងទទួលបានការព្យាបាលបន្ថែមទៀត សម្រាប់ស្ថានភាពជំងឺរបស់ពួកគេ ។

កុមារទាំង ២នាក់នេះ រួមមានក្មេងប្រុស Fadi ដែលមានជំងឺស្វិតសួត និងកង្វះខាតអាហារូបត្ថម្ភធ្ងន់ធ្ងរ និងក្មេងស្រី Nour ដែលមានជំងឺមហារីកគ្រាប់ឈាម ។ ក្មេងទាំង ២ និងសមាជិកគ្រួសារមួយចំនួនរបស់ពួកគេ នឹងត្រូវបញ្ជូនបន្តទៅកាន់ប្រទេសអេហ្ស៊ីប ដើម្បីទទួលការព្យាបាលបន្ថែមទៀត ។

ដោយប្រឈមនឹងកង្វះខាតគ្រឿងផ្គត់ផ្គង់វេជ្ជសាស្រ្ត សេវាកម្ម និងឱសថធ្ងន់ធ្ងរ បុគ្គលិកមន្ទីរពេទ្យ Kamal Adwan និងក្រុមគ្រួសារក្មេងៗមានជំងឺរ៉ាំរ៉ៃ បានអំពាវនាវដល់សហគមន៍អន្តរជាតិឲ្យមានការជម្លៀសចេញកុមារមានជំងឺធ្ងន់ធ្ងរជាបន្ទាន់ ។

WHOបាននិយាយកាលពីខែមុនថា ៩០ភាគរយនៃកុមារក្រោមអាយុ ៥ឆ្នាំ បានរងផលប៉ះពាល់ដោយសារជំងឺឆ្លង ក្នុងនោះ ៧០ភាគរយនៃពួកគេ មានជំងឺអាសន្នរោគ កាលពីរយៈពេល ២សប្តាហ៍មុន ពោលគឺជាករណីកើនឡើងជាង ២៣ដងពីពេលមុនសង្រ្គាម ។

អ៊ីស្រាអែល និយាយថាមន្ទីពេទ្យនានា នៅក្នុងតំបន់ហ្កាហ្សា ត្រូវបានប្រើប្រាស់ដោយក្រុមសកម្មប្រយុទ្ធហាម៉ាស់ប៉ាឡេស្ទីនជាមូលដ្ឋានរបស់ពួកគេ ហើយបានបញ្ចេញវីដេអូ និងរូបភាពសំអាងដល់ការអះអាងរបស់ពួកគេ ប៉ុន្តែបុគ្គលិកពេទ្យ និងក្រុមហាម៉ាស បានបដិសេធរឿងនេះ។ 

យោធាអ៊ីស្រាអែល និយាយនៅក្នុងសេចក្តីថ្លែងការណ៍កាលពីថ្ងៃចន្ទថា កងកម្លាំងរបស់ខ្លួន បន្តសកម្មភាពប្រតិបត្តិការក្នុងបរិវេនមន្ទីរពេទ្យ Shifa ខណៈទប់ស្កាត់មិនឲ្យប៉ះពាល់ដល់ជនស៊ីវិល អ្នកជំងឺ ក្រុមគ្រូពេទ្យ និងគ្រឿងបរិក្ខាពេទ្យ ៕