ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសថា ស្ត្រីម្នាក់អាយុ ៦៧ឆ្នាំ គឺជាពលរដ្ឋទី៦លានដែលទទួលបានការចាក់វ៉ាក់សាំងបង្ការជំងឺកូវីដ-១៩ ដែលជាកិច្ចខិតខំប្រឹងប្រែងរបស់រាជរដ្ឋាភិបាលដើម្បីបង្កើតភាពស៊ាំដល់ប្រជាពលរដ្ឋនៅទូទាំងប្រទេស។
សម្ដេចតេជោ ហ៊ុន សែន បានប្រកាសឱ្យដឹងបែបនេះនៅលើទំព័រហ្វេសប៊ុករបស់សម្ដេចនៅល្ងាចថ្ងៃនេះ ដោយបញ្ជាក់ថា អ្នកស្រី ផេង សឿន អាយុ ៦៧ឆ្នាំនោះ គឺជាពលរដ្ឋរស់នៅភូមិតាអុង ឃុំតាអុង ស្រុកចំការលើ ខេត្តកំពង់ចាម។
សម្ដេចតេជោ ហ៊ុន សែន ប្រកាសទៀតថា ស្ត្រីជាកសិកររូបនេះ នឹងទទួលបានថវិកាចំនួន ១០លានរៀល ដែលនឹងប្រគល់ជូនដោយលោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល។
គិតត្រឹមថ្ងៃនេះ កម្ពុជាបានចាក់វ៉ាក់សាំងជូនប្រជាពលរដ្ឋបានជាង ៦លាននាក់ហើយ បន្ទាប់ពីយុទ្ធនាការចាក់វ៉ាក់សាំងទូទាំងប្រទេសបានចាប់ផ្ដើមតាំងពីថ្ងៃទី១០ ខែកុម្ភៈកន្លងមក៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
