ពោធិ៍សាត់ ៖ នាព្រឹកថ្ងៃទី២៨ ខែមីនា ឆ្នាំ២០២៤ ខេត្តពោធិ៍សាត់ បានរៀបចំកិច្ចប្រជុំផ្សព្វផ្សាយអំពីលទ្ធផលសន្និបាត បូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងអភិវឌ្ឍន៍ជនបទ ។ ពីធីនេះប្រព្រឹត្តិទៅក្រោមអធិបតីភាព ឯកឧត្តម អ៊ិន ចន្ថា រដ្ឋលេខាធិការ តំណាងឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងដោយមានការចូលរួមពីឯកឧត្តម សុង សុផល អនុរដ្ឋលេខាធិការ លោកឡាយ វិសិដ្ឋ អភិបាលរងខេត្ត គណៈអភិបាលស្រុក-ក្រុង ក្រុមប្រឹក្សាស្រុក-ក្រុង មន្ទីរអង្គភាពពាក់ព័ន្ធ អង្គការដៃគូរ និងមន្ត្រីមន្ទីរអភិវឌ្ឍន៍ជនបទខេត្តសរុប ៧០នាក់។
ឯកឧត្តម អ៊ិន ចន្ថា រដ្ឋលេខាធិការ បានមានប្រសាសន៍ដោយពាំនាំមកនូវការផ្តាំផ្ញើសួរសុខទុក្ខពីសំណាក់ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទព្រមទាំងផ្សព្វផ្សាយអនុសាសន៍ទាំង១៣ចំណុច របស់សម្តេចមហាបវរធិបតី ហ៊ុន ម៉ាណែតនាយករដ្ឋមន្ត្រី នៃព្រះរាជាណាចក្រកម្ពុជាក្នុងឱកាសបិទសន្និបាតរបស់ក្រសួងអភិវឌ្ឍន៍ជនបទ។ ឯកឧត្តម អ៊ិន ចន្ថា បានវាយតម្លៃខ្ពស់ ចំពោះកត្តាសន្តិភាព ដែលបានផ្តល់ឱកាសឱ្យមន្ត្រីតាំងពីថ្នាក់ជាតិ និងថ្នាក់ក្រោមជាតិសម្រេចបាននូវសមិទ្ធផលគឺជាមូលដ្ឋានគ្រឹះសម្រាប់បន្តនូវយុទ្ធសាស្ត្របញ្ចកោណដំណាក់កាលទី១គឺកំណើន ការងារ សមធម៌ ប្រសិទ្ធភាព និងចីរភាពព្រមទាំងកំណត់អាទិភាពគន្លឹះចំនួន ៥គឺមនុស្ស ផ្លូវ ទឹក ភ្លើងនិងបច្ចេកវិទ្យា។ ឯកឧត្តម បានបន្តលើកឡើងពីសារសំខាន់ នៃការអភិវឌ្ឍន៍ជនបទដោយផ្តោតលើវិស័យអាទិភាពទាំង៤របស់ ក្រសួងអភិវឌ្ឍន៍ជនបទរួមមាន១-អភិវឌ្ឍហេដ្ឋារចនាសម្ព័ន្ធរូបវន្តនិងគមនាគមន៍ជនបទ ២-កែលម្អលក្ខខណ្ឌនៃការរស់នៅរបស់ សហគមន៍ជនបទ ៣-ការធ្វើពិពីធកម្ម សកម្មភាពសេដ្ឋកិច្ចជនបទ និង៤-ពង្រឹងសេវាគាំទ្ររដ្ឋបាល និងកិច្ចការទូទៅ។ ទាំងនេះពិតជាមានសារៈសំខាន់ក្នុងការរួមចំណែកជំរុញឱ្យសម្រចបាននូវគោលបំណងលើកកម្ពស់គុណភាពគុណតម្លៃនៃជីវិតរស់នៅរបស់ប្រជាជនប្រកបដោយ បរិយាបន្នទាំងផ្នែកសេដ្ឋកិច្ច សង្គមនិងវប្បធម៌។ ជាមួយ គ្នានោះក្រសួងបានដាក់ចេញទិសដៅ និងភារកិច្ចបន្តក្នុងគោលបំណងពង្រឹងគុណភាព ផ្លូវជនបទឱ្យកាន់តែរឹងមាំ ប្រើប្រាស់បានយូរ អង្វែង និងផែនការគ្របដណ្តប់ផ្គត់ផ្គង់ទឹកស្អាត និងអនាម័យទូទាំងប្រទេសជំរុញសេដ្ឋកិច្ចគ្រួសារជនបទឱ្យមានការកើនឡើងដើមបីកាត់បន្ថយភាពក្រីក្រនៅកម្ពុជា។
បើតាមរបាយណ៍របស់លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្ត បានឲ្យដឹងថា ការងារផ្លូវជនបទមន្ទីរបានចុះពិនិត្យនិងអនុវត្តគម្រោងថែទាំផ្លូវប្រចាំចំនួន១០ខ្សែប្រវែងជាង១០៤គីឡូម៉ែត្រ ស្ថាបនាផ្លូវក្រាលក្រួសក្រហម១ខ្សែប្រវែងជាង៧គីឡូម៉ែត្រ និងផ្លូវបេតុង១ខ្សែប្រវែង១២០០ម៉ែត្រ។ ចំពោះការផ្គត់ផ្គង់ទឹកស្អាតជនបទ មន្ទីរបានរៀបចំផែនការទីតាំងអណ្តូងចំនួន២០ បានប្រកាសឃុំមានអត្រាគ្របដណ្តប់បង្គន់៩០%និងអត្រាប្រើប្រាស់ បង្គន់១០០%ក្រោមគម្រោងADB។ ជាមួយគ្នានោះមន្ទីរបានចុះសិក្សា និងប្រជុំវាយតម្លៃដើម្បីកំណត់អត្តសញ្ញាណជនជាតិដើមនៅស្រុកវាលវែងមានចំនួន ៤១៥គ្រួសារមនុស្សជិត២០០០នាក់ និងបានចែកវិញ្ញាបនបត្រជូនសិក្ខាកាមបញ្ចប់វគ្គសិក្សាឆ្នាំ២០២៣ចំនួន២៥នាក់៕ អត្ថបទ៖ ភិរុណ ពៅ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
