រដ្ឋមន្ត្រីការពារជាតិអាមេរិក លោក Lloyd Austin បានអះអាងសារជាថ្មីនូវការប្តេជ្ញាចិត្តរបស់ទីក្រុងវ៉ាស៊ីនតោនចំពោះសន្ធិសញ្ញាការពារទៅវិញទៅមកជាមួយហ្វីលីពីន ហើយបានរិះគន់ការប្រើប្រាស់កាណុងបាញ់ទឹករបស់ចិនថា ពិតជា«គ្រោះថ្នាក់» និងការរំខានដល់បេសកកម្មផ្គត់ផ្គង់ឡើងវិញរបស់ហ្វីលីពីន កាលពីសប្តាហ៍មុន។
សេចក្តីថ្លែងការណ៍មួយពីមន្ទីរបញ្ចកោណ បាននិយាយថា នៅក្នុងការសន្ទនាតាមទូរស័ព្ទកាលពីថ្ងៃពុធជាមួយសមភាគីហ្វីលីពីនលោក Gilberto Teodoro លោក Austin «បានអះអាងសារជាថ្មីនូវការប្តេជ្ញាចិត្តរបស់សហរដ្ឋអាមេរិកចំពោះហ្វីលីពីន» បន្ទាប់ពីការរារាំងរបស់ចិនចំពោះបេសកកម្មផ្គត់ផ្គង់ឡើងវិញស្របច្បាប់របស់ហ្វីលីពីននៅតំបន់ថ្មប៉ប្រះទឹកថូម៉ាសទី២ (Thomas Shoal)។
លោក Austin បានសង្កត់ធ្ងន់លើការគាំទ្រដល់ហ្វីលីពីនក្នុងការការពារសិទ្ធិអធិបតេយ្យភាព និងយុត្តាធិការរបស់ខ្លួន។
ហ្វីលីពីនតាមធម្មតាបញ្ជូនទូកទៅកាន់តំបន់ថ្មប៉ប្រះទឹកថូម៉ាសទី២ ដើម្បីផ្តល់ការផ្គត់ផ្គង់ដល់ទាហានមួយក្រុមតូចរបស់ខ្លួនដែលបានឈរជើង ដើម្បីការពារនាវាចម្បាំងមួយគ្រឿង ដែលបានចូលចតដោយចេតនានៅតំបន់ថ្មប៉ប្រះទឹកនេះរយៈពេល២៥ឆ្នាំហើយនោះ។
ហ្វីលីពីនមានការខឹងសម្បាចំពោះអ្វីដែលខ្លួនហៅថា ការឈ្លានពានម្តងហើយម្តងទៀតដោយឆ្មាំឆ្នេររបស់ប្រទេសចិនជុំវិញតំបន់មានជម្លោះ ដែលមានទីតាំងនៅក្នុងតំបន់សេដ្ឋកិច្ចផ្តាច់មុខចម្ងាយ ២០០ម៉ាយរបស់ទីក្រុងម៉ានីល។
កាលពីថ្ងៃចន្ទ ប្រទេសចិន បានព្រមានហ្វីលីពីនឲ្យប្រព្រឹត្តដោយប្រុងប្រយ័ត្ន និងស្វែងរកការសន្ទនា ដោយនិយាយថា ទំនាក់ទំនងរបស់ពួកគេ គឺនៅត្រង់«ផ្លូវបំបែក» ខណៈដែលការប្រឈមមុខដាក់គ្នារវាងឆ្មាំឆ្នេរ របស់ពួកគេជុំវិញការះអះអាងទាមទារដែនសមុទ្រ ធ្វើឲ្យភាពតានតឹងកាន់តែអាក្រក់ៗឡើង។