កាលពីថ្ងៃពុធម្សិលមិញ ប្រទេសព័រតូរីកូ បានប្រកាសអាសន្នសុខភាពសាធារណៈ បន្ទាប់ពីការកើនឡើងខ្លាំងករណីឆ្លងជំងឺគ្រុនឈាមនៅក្នុងប្រទេសកោះមួយនេះ ។

ការឆ្លងជំងឺគ្រុនឈាម បានក្លាយជារឿងធម្មតាទៅហើយនៅក្នុងប្រទេសព័រតូរីកូ ប៉ុន្តែគេមិននឹកស្មានថាវាចាប់ផ្តើមកើតឡើងនៅក្នុងរដូវប្រាំងបែបនេះនោះទេ ពីព្រោះជាទូទៅវាកើតឡើងនៅក្នុងរដូវវស្សា ។

ករណីឆ្លងជំងឺគ្រុនឈាន កើតឡើងភាគច្រើនចន្លោះខែសីហា និងខែធ្នូ ប៉ុន្តែទោះបីជាយ៉ាងណាក៏ដោយ ក្នុងឆ្នាំនេះ ករណីឆ្លងជំងឺគ្រុនឈាម បានកើតឡើងនៅក្នុងរដូវដែលគេពុំធ្លាប់ដែលឃើញមានកាលពីមុនមក ។

ចាប់តាំងពីដើមឆ្នាំ មកទល់នឹងពេលនេះ ករណីឆ្លងជំងឺគ្រុនឈាម ៥៤៩នាក់ ត្រូវបានរកឃើញនៅប្រទេសព័រតូរីកូ ហើយប្រហែល ៦២ភាគរយនៃករណីឆ្លង បានសម្រាកព្យាបាលនៅក្នុងមន្ទីរពេទ្យ ។

លោកស្រីវេជ្ជបណ្ឌិត Iris Cardona គឺជាប្រធាននាយកដ្ឋានសុខាភិបាលព័រតូរីកូ និយាយថា បើសិនជាករណីឆ្លងបន្តកើនឡើង ប្រព័ន្ធសុខភាពប្រទេសរបស់លោកស្រីអាចនឹងត្រូវសម្របសម្រួល ។

លោកស្រីបន្តថា កាលពីថ្ងៃម្សិលមិញ ការប្រកាសអាសន្នសុខភាពសាធារណៈ ត្រូវបានចេញ ដោយសារតែការកើនឡើងករណីឆ្លងជំងឺគ្រុនឈាម ក្នុងរយៈពេល ៨សប្តាហ៍ចុងក្រោយ ។

ខណៈពេលនោះដែរ ក្រុមអាជ្ញាធរ បានចុះប្រតិបត្តិការបាញ់ថ្នាំ ដើម្បីកម្ចាត់មូសនៅប្រទេសព័រតូរីកូ ៕