ការបើកកិច្ចប្រជុំពេញអង្គនៃវេទិកា Boao ប្រចាំអាស៊ី (BFA) ដែលជាសន្និសីទប្រចាំឆ្នាំ២០២៤ ត្រូវបានប្រារព្ធឡើង នៅថ្ងៃព្រហស្បតិ៍ (ទី២៨ ខែមីនា) នេះ នៅទីក្រុងឆ្នេរសមុទ្រ Boao ខេត្ត Hainan (ហៃណាន) ភាគខាងត្បូងប្រទេសចិន។

លោក Zhao Leji ប្រធានគណៈកម្មាធិការអចិន្ត្រៃយ៍សភាប្រជាជន បានចូលរួមបើកកិច្ចប្រជុំពេញអង្គ និងថ្លែងសុន្ទរកថាសំខាន់ៗ។ សន្និសីទរយៈពេល៤ថ្ងៃ ដែលបានចាប់ផ្តើម កាលពីថ្ងៃអង្គារ (ទី២៦ ខែមីនា) នោះ មានការចូលរួមពីគណៈប្រតិភូប្រហែល ២.០០០នាក់មកពីជាង ៦០ប្រទេស និងតំបន់ ហើយនិងអ្នកសារព័ត៌មានជាង ១.១០០នាក់មកពីប្រហែល ៤០ប្រទេស និងតំបន់។

ប្រធានបទស្ដីអំពី «អាស៊ី និងពិភពលោក គឺបញ្ហាប្រឈមរួម ការទទួលខុសត្រូវរួម» ព្រឹត្តិការណ៍នេះ ផ្តោតលើប្រធានបទសំខាន់ៗចំនួន៥ ដែលមានដូចជា «សេដ្ឋកិច្ចពិភពលោក» «នុវានុវត្តន៍វិទ្យាសាស្ត្រ និងបច្ចេកវិទ្យា» «ការអភិវឌ្ឍសង្គម» «កិច្ចសហប្រតិបត្តិការអន្តរជាតិ» ហើយនិង «ការរួមគ្នាដោះស្រាយបញ្ហាប្រឈមនានា»។

ដោយត្រូវបានបង្កើតឡើងក្នុងឆ្នាំ២០០១ វេទិកា BFA គឺជាអង្គការអន្តរជាតិមិនមែនរដ្ឋាភិបាល និងមិនរកប្រាក់ចំណេញ ដែលបានប្តេជ្ញាចិត្តក្នុងការលើកកម្ពស់សមាហរណកម្មសេដ្ឋកិច្ចក្នុងតំបន់ និងនាំឲ្យបណ្តាប្រទេសអាស៊ីកាន់តែខិតទៅកៀកនឹងការសម្រេចគោលដៅអភិវឌ្ឍន៍របស់ខ្លួន៕