ក្រសួងការបរទេសអេស្ប៉ាញ និយាយថា កាលពីថ្ងៃពុធម្សិលមិញ អេស្ប៉ាញ បានទម្លាក់ជំនួយមនុស្សធម៌ទម្ងន់ ២៦តោនពីលើអាកាសដល់តំបន់ហ្កាហ្សាស្រ្ទីប ។

ក្រសួងបាននិយាយនៅក្នុងសេចក្តីថ្លែងការណ៍ថា ប្រតិបត្តិការទម្លាក់ជំនួយនេះ បានធ្វើឡើងដោយមានការសម្របសម្រួលជាមួយហ្សកដានី និងផ្តល់ហិរញ្ញប្បទានរួមគ្នាដោយសហភាពអឺរ៉ុប ។ 

យន្តហោះយោធា Airbus A400 ចំនួន ២គ្រឿង បានចុះប្រតិបត្តិការទម្លាក់ជំនួយពីលើអាកាស ដើម្បីបន្ធូរបន្ថយកម្រិតគ្រោះថ្នាក់នៃអសន្តិសុខស្បៀងដែលប្រឈមដោយមនុស្ស ១,១លាននាក់នៅក្នុងតំបន់ហ្កាហ្សា ។

រូបភាពវីដេអូឃ្លីបចេញដោយក្រសួងការបរទេសអេស្ប៉ាញ ឃើញជំនួយត្រូវបានទម្លាក់ពីលើយន្តហោះទៅកាន់ដីតាមឆ័ត្រយោង ។

កាលពីសប្តាហ៍មុន របាយការណ៍គាំទ្រដោយអង្គការសហប្រជាជាតិ(UN) បាននិយាយថា គ្រោះទុរ្ភិក្សជិតមកដល់ ហើយទំនងជាកើតមានក្នុងខែឧសភា នៅតំបន់ភាគខាងជើងហ្កាហ្សា ហើយអាចនឹងរីករាលដាលពេញតំបន់បិទច្រកមួយនេះ នៅខែកក្កដា ក្រោយសង្រ្គាមអស់រយៈពេលជាង ៥ខែ ដែលបានបំផ្លិចបំផ្លាញដែនដីប៉ាឡេស្ទីនមួយនេះ ស្ទើតែទាំងស្រុង ក៏ដូចជាបានកាត់ផ្តាច់ការផ្គត់ផ្គង់ ។

ក្រសួងសុខាភិបាលប៉ាឡេស្ទីនគ្រប់គ្រងដោយក្រុមហាម៉ាស់ បាននិយាយកាលពីថ្ងៃពុធថា ចំនួនអ្នកស្លាប់របស់ពលរដ្ឋប៉ាឡេស្ទីនពីការវាយប្រហាររបស់អ៊ីស្រាអែល បានកើនឡើងដល់ ៣២.៤៩០នាក់ ។ 

ក្រសួងបាននិយាយនៅក្នុងសេចក្តីថ្លែងការណ៍ថា ក្នុងរយៈពេល ២៤ ម៉ោង កន្លងទៅនេះ កងទ័ពអ៊ីស្រាអែល បានសម្លាប់ពលរដ្ឋប៉ាឡេស្ទីន ៧៦នាក់ និង ១០២នាក់ផ្សេងទៀតបានរងរបួស ធ្វើឲ្យចំនួនអ្នកស្លាប់សរុបនៅតំបន់ហ្កាហ្សា ចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី ៧ ខែតុលា ឆ្នាំ ២០២៣ កើនឡើងដល់ ៣២.៤៩០នាក់ និងអ្នករបួសកើនឡើងដល់ ៧៤.៨៨៩ នាក់ ៕