ទីភ្នាក់ងារមូលនិធិជំនួយមនុស្សធម៌ទួរគី(IHH) បានបង្ហាញនាវាថ្មីពីរគ្រឿងកាលពីថ្ងៃពុធ ដែលមានបំណងបញ្ជូនជំនួយដោយផ្ទាល់ទៅកាន់តំបន់ហ្កាហ្សា ជាកន្លែងដែលប្រជាជនប៉ាឡេស្ទីន ប្រឈមនឹងគ្រោះទុរ្ភិក្សជិត៥ខែ នៅក្នុងយុទ្ធនាការយោធាដ៏បំផ្លិចបំផ្លាញរបស់អ៊ីស្រាអែល។

ប្រទេសទួរគី ដែលបានរិះគន់អ៊ីស្រាអែលចំពោះការវាយលុករបស់ខ្លួន នៅតំបន់ហ្កាហ្សា ដែលមានប្រជាជនរស់នៅច្រើន និងបានអំពាវនាវឲ្យមានបទឈប់បាញ់ជាបន្ទាន់នោះ បានបញ្ជូនជំនួយមនុស្សធម៌រាប់ម៉ឺនតោនទៅកាន់ទីនោះ ចាប់តាំងពីការចាប់ផ្តើមនៃសង្គ្រាមអ៊ីស្រាអែល និងក្រុមហាម៉ាសកាលពីថ្ងៃទី៧ ខែតុលា ហើយមានគោលបំណងបង្កើនវា ក្នុងអំឡុងខែដ៏ពិសិដ្ឋនៃបុណ្យសាសនាមូស្លីមរ៉ាម៉ាដាន។

ប្រធាន IHH លោក Bulent Yildirim បានត្រួតពិនិត្យនាវាថ្មីដែលបានទិញសម្រាប់គម្រោងជំនួយហ្កាហ្សា ដែលមានឈ្មោះថា «International Freedom Flotilla» នៅក្នុងកំពង់ផែអ៊ីស្តង់ប៊ុល ហើយបាននិយាយថា មួយក្នុងចំណោមនាវាទាំងពីរ គឺ Anadolu (Anatolia) មានសមត្ថភាពផ្ទុកបានចំណុះ៥.៥០០តោន។

នាវា Anadolu នឹងត្រូវផ្ទុកដោយសម្ភារៈជំនួយ ខណៈដែលនាវាមួយគ្រឿងទៀត នឹងផ្ទុកបុគ្គលិកមនុស្សធម៌ រួមទាំងគ្រូពេទ្យផងដែរ។