សេវាកម្មសង្រ្គោះបន្ទាន់ និយាយថា នៅថ្ងៃព្រហស្បតិ៍នេះ កងកម្លាំងសន្តិសុខអ៊ីស្រាអែល បានដំឡើងប៉ុស្តិ៍ត្រួតពិនិត្យនៅជិតកន្លែងខ្មាន់កាំភ្លើងម្នាក់ បានបាញ់រះលើរថយន្តជាច្រើនគ្រឿង ស្ថិតក្នុងតំបន់កាន់កាប់វ៉េសប៊ែង បណ្តាលឲ្យមនុស្សយ៉ាងហោច ៣នាក់ រងរបួស ក្នុងនោះរួមទាំងក្មេងប្រុសអាយុ ១៣ឆ្នាំម្នាក់ផងដែរ ។

យោធាអ៊ីស្រាអែល និយាយថា ទាហានបានបិទផ្លូវនៅតំបន់នោះ ស្ថិតនៅជាប់ទីក្រុង Al-Auja នៃតំបន់ Jordan Valley ហើយពួកគេកំពុងតាមប្រម៉ាញ់ខ្មាន់កាំភ្លើងផងដែរ ។

សារព័ត៌មានអ៊ីស្រាអែល រាយការណ៍ថា បុរសម្នាក់ស្លៀកពាក់ឯកសណ្ឋានយោធា បានបាញ់រះលើរថយន្តធ្វើដំណើរឆ្លងកាត់ជាច្រើនគ្រឿង បណ្តាលរថយន្តបុករថយន្តក្រុងដឹកសិស្សសាលា ក្នុងនោះក្មេងប្រុសអាយុ ១៣ឆ្នាំម្នាក់ បានរងរបួសដោយសារបំណែកគ្រាប់ ហើយមនុស្សប្រុស ២នាក់ទៀត បានរងរបួសនៅក្នុងរថយន្តដាច់ដោយឡែកពីគ្នា ៕