ប្រទេសរុស្ស៊ីកាលពីថ្ងៃពុធ បានអះអាងពីការវាយប្រហារលើគោលដៅជាច្រើន ក្នុងនោះរួមមានចំណុចឃ្លាំងយានដ្រូនអ៊ុយក្រែនផងដែរ ខណ:ដែលអ៊ុយក្រែន បានបញ្ជាក់នៅថ្ងៃជាមួយគ្នាថា ខ្លួនបានវាយបកទៅនឹងការវាយលុកជាច្រើនរបស់រុស្ស៊ី ហើយនិងបានចាប់ផ្ដើមវាយប្រហារតាមអាកាសលើទីតាំងជាច្រើនរបស់រុស្ស៊ីទៀតផង។

ក្រសួងការពារជាតិរុស្ស៊ី បាននិយាយ កាលពីថ្ងៃពុធថា កងទ័ពរុស្ស៊ី បានវាយប្រហារលើកន្លែងប្រមូលផ្ដុំ និងចំណុចឃ្លាំងយានដ្រូនរបស់អ៊ុយក្រែន និងបានវាយបកទៅនឹងការវាយប្រហាររបស់អ៊ុយក្រែន ដែលចេញពីមុខព្រួញជាច្រើន ដូចជា គូពីយ៉ាំង ដូនេត និងអាវដេយេវកា (Avdeyevka) ដោយបានវាយប្រហារទៅលើ ប្រព័ន្ធរ៉ាដាប្រឆាំងនឹងកាំភ្លើងធំ ស្ថានីយមូលដ្ឋានសង្រ្គាមអេឡិចត្រូនិក ឃ្លាំងស្ដុកគ្រាប់រំសេវ និងគោលដៅជាច្រើនទៀត។

អភិបាលតំបន់បេលហ្គូរ៉ូតរបស់រុស្ស៊ី បាននិយានៅលើប្រព័ន្ធផ្សព្វផ្សាយសង្គម នៅថ្ងៃជាមួយគ្នាថា រដ្ឋនេះ បានទទួលរងការវាយប្រហារជាច្រើនលើកពីយានដ្រូនរបស់អ៊ុយក្រែន ដែលបណ្ដាលឱ្យបុគ្គលិកយោធាម្នាក់ រងរបួស។

នៅថ្ងៃជាមួយគ្នានេះ អគ្គសេនាធិការកងទ័ពអ៊ុយក្រែន បានចេញរបាយការណ៍សមរភូមិ ដោយបញ្ជាក់ថា កងទ័ពអ៊ុយក្រែន បានជាប់ទាក់ទងនឹងការប្រយុទ្ធរាប់សិបលើក ជាមួយកងទ័ពរុស្ស៊ីនៅលើសមរភូមិ។ កងទ័ពអ៊ុយក្រែន ក៍បានវាយប្រហារបុគ្គលិកយោធា និងឧបករណ៍សឹករបស់រុស្ស៊ីផងដែរ ពោលគឺវាយប្រហាគោលដៅសំខាន់ៗដូចជាប្រព័ន្ធការពារដែនអាកាសរបស់រុស្ស៊ីផងដែរ។

យោងតាមរបាយការមួយរបស់ទីភ្នាក់ងារសារព័ត៌មានជាតិអ៊ុយក្រែន បាននិយាយកាលពីថ្ងៃពុធថា អភិបាលក្រុងមីកូឡៃ (Mykolayiv) ) បានថ្លែងថា ក្រុងនេះ បានទទួលរងការវាយប្រហារដោយមីស៊ីលបាលីស្ទីករុស្ស៊ីពីរដើម បណ្ដាលឱ្យមនុស្ស៨នាក់រងរបួស។ 

អគារអ្នកស្រុក៤ខ្នង និងក្រុមហ៊ុនមួយក៏បានខូចខាតផងដែរ។