វិមានក្រឹមឡាំង នៅថ្ងៃព្រហស្បតិ៍ (ទី២៨ ខែមីនា) នេះ បាននិយាយថា ភាពស្ងៀមស្ងាត់ទាំងស្រុង គឺចាំបាច់នៅពេលដែលនិយាយដល់ការពិភាក្សាអំពីការដោះដូរអ្នកទោសដែលអាចកើតមានឡើង ពាក់ព័ន្ធនឹងអ្នកសារព័ត៌មាន លោក Evan Gershkovich របស់សារព័ត៌មាន Wall Street Journal (WSJ) ដែលត្រូវបានចាប់ខ្លួននៅប្រទេសរុស្ស៊ី កាលពី ១ឆ្នាំមុនពីបទសង្ស័យចារកម្ម។

គួរបញ្ជាក់ថា លោក Gershkovich វ័យ ៣២ឆ្នាំ បានក្លាយជាសារព័ត៌មានអាមេរិកដំបូងគេដែលត្រូវបានចាប់ខ្លួនពីបទចារកម្ម នៅរុស្ស៊ី គិតចាប់តាំងពីសង្គ្រាមត្រជាក់ នៅពេលដែលរូបគេត្រូវបានឃុំខ្លួនដោយសេវាសន្តិសុខសហព័ន្ធ (FSB) កាលពីថ្ងៃទី២៩ ខែមីនា។

អ្នកសារព័ត៌មាន ស្ថាប័នសារព័ត៌មាន និងរដ្ឋាភិបាលសហរដ្ឋអាមេរិក សុទ្ធតែបដិសេធថា ជនជាប់ចោទរូបនេះមិនមែនជាចារកម្មនោះទេ។ រុស្ស៊ីនិយាយថា លោកត្រូវបានចាប់ខ្លួនដោយសារប្រព្រឹត្តខុស។ នៅពេលសួរអំពីថា តើពេលណាតុលាការនឹងបើកសវនាការលើសំណុំរឿងរបស់លោក Gershkovich ឬថា តើនឹងមានការដោះដូរអ្នកទោសដែរ ឬទេ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «យើងមិនមានព័ត៌មានអំពីតុលាការទេ ព្រោះវាមិនមែនជាសិទ្ធិអំណាចរបស់យើងនោះឡើយ»។

លោក Peskov បានបន្ថែមថា៖ «ចំពោះបញ្ហាផ្លាស់ប្តូរ យើងបានសង្កត់ធ្ងន់ម្តងហើយម្តងទៀតថា មានការទាក់ទងយ៉ាងជាក់លាក់ ប៉ុន្តែពួកគេត្រូវតែអនុវត្តដោយស្ងៀមស្ងាត់»។ លោកបានបញ្ជាក់ថា ការកត់សម្គាល់ជាសាធារណៈ គឺជាឧបសគ្គដល់ដំណើរការនេះ៕