តាមរយៈមជ្ឈមណ្ឌលការងារចល័ត ទីភ្នាក់ងារជាតិ និងមុខរបរ នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៩ ខែមីនានេះ បានបន្តនាំយកឱកាសការងារចំនួនសរុបជាង ១ម៉ឺនកន្លែង ដល់កម្មកររោងចក្រ អ.ជី ហ្វ៊ូតវែរ (ខេមបូឌា) ឯ.ក នៅសាលាស្រុកអង្គស្នួល ខេត្តកណ្តាល រហូតដល់បំណាច់ខែមីនា។
លោក ឆោម សុខឿន ប្រធានមជ្ឈមណ្ឌលការងាររាជធានីភ្នំពេញ នៃទីភ្នាក់ងារជាតិមុខរបរ និងការងារ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី ឲ្យដឹងថា ការចុះផ្សព្វផ្សាយឱកាសការងារ និងចុះឈ្មោះអ្នកស្វែងរកការងារនៅតំបន់នេះ ដើម្បីផ្តល់ភាពងាយស្រួលសម្រាប់កម្មករនិយោជិត ដែលពុំទាន់រកការងារថ្មីធ្វើបាន ដោយអាចស្វែងរកការងារថ្មីបន្ទាប់ពីរោងចក្រនេះត្រូវបានអគ្គិភ័យឆាបឆេះខូចខាតទាំងស្រុងកាលពីពេលថ្មីៗកន្លងទៅ។
លោកបានឲ្យដឹងថាទៀតថា ការចុះផ្សព្វផ្សាយនេះ បានធ្វើឡើងចាប់តាំងពីពេលរោងចក្រមានបញ្ហាមកម្ល៉េះ និងបានកត់សំគាល់ឃើញថា តាមរយៈមជ្ឈមណ្ឌលការងារចល័តសម្រាប់ផ្តល់ព័ត៌មានអំពីឱកាសការងារជូនកម្មករនិយោជិត នៃរោងចក្រ អ.ជី ហ្វ៊ូតវែរ នេះ មានការចាប់អារម្មណ៍ និងការគាំទ្រជាច្រើនពីសំណាក់កម្មករនិយោជិត ក៏ដូចជាសាធារណៈជនទូទៅ។
សូមបញ្ជាក់ថា នៅថ្ងៃទី២៩ ខែមីនា ឆ្នាំ២០២៤នេះ ក្រសួងការងារ និងបណ្តុះបណ្តាលវិជ្ជាជីវៈ បានចាប់ផ្តើមបើកប្រាក់ឈ្នួល និងប្រាក់បំណាច់ផ្សេងៗ ដល់កម្មករនិយោជិត នៃរោងចក្រ អ.ជី ហ្វ៊ូតវែរ (ខេមបូឌា) ឯ.ក ដែលរងគ្រោះដោយសារអគ្គិភ័យឆេះរោងចក្រទាំងស្រុង នៅសាលាស្រុកអង្គស្នួល ខេត្តកណ្តាល ចាប់ពីម៉ោង ៩ព្រឹកតទៅ។ សម្រាប់ឯកសារ ដែលកម្មករនិយោជិតត្រូវភ្ជាប់មកជាមួយ ត្រូវមានដូចជា៖ ប័ណ្ណ(កាត) សម្គាល់ខ្លួនកម្មករនិយោជិត (ច្បាប់ដើម) ឬកិច្ចសន្យាការងារ និងសៀវភៅការងារកម្មករនិយោជិត ឬប័ណ្ណសមាជិក ប.ស.ស. ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន និង២. ប័ណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ(បើមាន)៕ អត្ថបទ៖ ឈិត បូរ៉ាវី