នាព្រឹកថ្ងៃទី២៩ ខែមីនា ឆ្នាំ២០២៤ គណៈប្រតិភូគណៈកម្មការសុខាភិបាលសង្គមកិច្ចអតីត​យុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា (គណៈកម្មការទី៨ ) ដឹកនាំដោយលោកជំទាវ ឡោក ខេង ប្រធានគណៈកម្មការ បានអញ្ជើញ​ចុះ​ពិនិត្យ ស្វែងយល់អំពីការផ្តល់សេវាសុខាភិបាល នៅមណ្ឌលសុខភាពសង្ឃ័រ ស្ថិតនៅក្នុង​ក្រុងស្វាយរៀង ខេត្តស្វាយរៀង ។

តាមសេចក្តីរាយការណ៍របស់លោកស្រី នាង សារ៉ាន់ ប្រធានមណ្ឌលសុខភាពសង្ឃ័របានឱ្យដឹងថា មណ្ឌលសុខភាពនេះជាប់ចំណាត់ថ្នាក់លេខ៤ ក្នុងចំណោមមណ្ឌលសុខភាពទាំង៤៩ និង​មាន​បុគ្គលិក​ចំនួន ១០នាក់ ក្នុងនោះមានពេទ្យឆ្មបមធ្យមចំនួន ២នាក់ គ្រប់ដណ្តប់ប្រជាជនចំនួន ១៤ ៧៨៧នាក់ មកពី២សង្កាត់និង១៥ភូមិ ព្រម​ទាំង​មាន​ប្រជាពលរដ្ឋ​នៅ​ភូមិ​ផ្សេងៗ​មក​ទទួល​សេវា​ផង​ដែរ។ មណ្ឌលសុខភាពសង្ឃ័រ មានសេវាពិគ្រោះជំងឺក្រៅ ពិគ្រោះជំងឺក្នុង និងសេ​វា​ពិនិត្យ​ជំងឺ​មិន​ឆ្លង ពិសេសជំងឺទឹកនោមផ្អែម ជំងឺលើសសម្ពាធឈាម និងជំងឺផ្សេងៗទៀត ។ ជាមួយ​គ្នា​នេះ​មណ្ឌល​សុខភាពមានការព្យាបាលដោយការបង់ប្រាក់មានចំនួនតិច និងមានអ្នក​មក​ទទួល​សេវា​ដោយ​ប្រើប្រាស់ប័ណ្ណសមធម៌ និង ប.ស.ស មានចំនួន៦០០ទៅ៨០០នាក់ ដែល​ភាគ​ច្រើន​ជា​កម្មករ កម្មការិនីតាមរោងចក្រ សហគ្រាស និងអ្នកបម្រើសេវាក្នុងសេដ្ឋកិច្ចក្រៅប្រព័ន្ធ ព្រម​ទាំង​មាន​មន្ត្រី​រាជ​ការផងដែរ ។ ចំពោះជំងឺមិនឆ្លងមកពិនិត្យមានចំនួនពី៨០០ ទៅ៩០០នាក់ ស្មើនឹង​៦០% ដែលភាគច្រើនកើតទៅលើប្រជាពលរដ្ឋចាប់ពីអាយុ៤០ឆ្នាំឡើងទៅ ដោយសារ​ទទួល​ទាន​របប​អាហារ មានការធ្វេសប្រហែសរបស់ប្រជាពលរដ្ឋ និងមិនទាន់យល់ដឹងច្បាស់ពីជំងឺនេះ។

ក្នុងឱកាសនោះដែរ លោកជំទាវ ឡោក ខេង បានមានប្រសាសន៍ថ្លែងអំណរគុណ និង​កោត​សរសើរ​ដល់​មន្ត្រីពេទ្យក្នុងមណ្ឌលសុខភាព ដែលខិតខំបម្រើសេវាសុខភាព​ជាសកល​ជូន​ប្រជា​ពលរដ្ឋ​ឱ្យ​ទាន់​ពេលវេលា និងជួយដាក់ប៉ាណូផ្សព្វផ្សាយ ព្រមទាំងប្រកាសទប់ស្កាត់ និង​ផ្សាយ​តាម​គ្រប់​រូបភាពទាំងអស់ពីផលលំបាកនៃជំងឺមិនឆ្លង ដែលជំងឺ​នេះ​បាន​សម្លាប់​ប្រជាពលរដ្ឋ​ក្នុង​មួយ​ថ្ងៃ​ៗ​ជិត២០០នាក់ ជូនដល់ប្រជាពលរដ្ឋឱ្យបានយល់ដឹងកាន់តែច្បាស់ ដើម្បី​កាត់​បន្ថយ​ភាព​ក្រីក្រ​ឈានសម្រេចបានគោលដៅឆ្នាំ២០៣០ជាប្រទេស ដែលមានចំណូលមធ្យមកម្រិតខ្ពស់ និង​ជា​ប្រទេសមានចំណូលខ្ពស់នៅឆ្នាំ២០៥០។ លោកជំទាវ បានជម្រុញឱ្យមន្ត្រីពេទ្យទាំងអស់ និង​មន្ត្រី​ប.ស.ស ត្រូវចូលរួមសហការផ្សព្វផ្សាយពីសារៈសំខាន់នៃប.ស.សបន្ថែមទៀត និងត្រូវជំរុញ​ឱ្យ​មន្ត្រី​ទាំង​អស់ពង្រឹងសមត្ថភាពរបស់ខ្លួនបន្ថែមទៀត និងទទួលយក​សំណើរ​ទាំង​អស់​របស់​មណ្ឌល​សុខ​ភាព​យកទៅពិភាក្សា ជាមួយក្រសួង និងជំរុញ ពន្លឿន​ការ​ដោះស្រាយ​ជូន​មណ្ឌល​សុខភាព​ឱ្យ​បាន​ឆាប់រហ័ស៕