​​កូរ៉េខាងត្បូង៖ ការិយាល័យ​ប្រធានាធិបតី​កូរ៉េខាងត្បូង​និយាយ​ថា លោក​ប្រធានាធិបតី Moon Jae-in បាន​សម្រេច​ចិត្ត​មិន​ទៅ​ទស្សនា​ប្រទេស​ជប៉ុន​ សម្រាប់​ពិធី​បើក​ព្រឹត្តិការណ៍​អូឡាំពិក​ទីក្រុង​តូ​ក្យូ​ដែល​នឹង​ត្រូវ​ធ្វើឡើង​នៅ​ថ្ងៃ​សុក្រ​ទេ​។​ ​ការិយាល័យ​នេះ​បាន​ប្រកាស​សេចក្តី​សម្រេច​កាលពី​ថ្ងៃ​ចន្ទ​។

ការិយាល័យ​ដដែល​និយាយ​ថា​ រដ្ឋមន្ត្រី​កីឡា ​លោក Hwang Hee គ្រោង​នឹង​ចូលរួម​ពិធី​នេះ​ជំនួស​វិញ​។​ ការិយាល័យ​នេះ​បាន​នឹង​កំពុង​រៀបចំ​សម្រាប់​លោក Moon ទៅ​ទស្សនកិច្ច​នៅ​ប្រទេស​ជប៉ុន​ក្នុង​អំឡុង​ព្រឹត្តិការណ៍​អូឡាំពិក​ និង​រៀបចំ​កិច្ចប្រជុំ​កំពូល​ដោយ​ផ្ទាល់​ជាមួយ​នាយករដ្ឋមន្ត្រី​ជប៉ុន​ លោក Suga Yoshihide​។​ នេះ​នឹង​ក្លាយ​ជា​ដំណើរ​ទស្សនកិច្ច​លើកដំបូង​របស់​លោក Moon ទៅកាន់​ប្រទេស​ជប៉ុន​ក្នុង​រយៈពេល​ជាង ២​ឆ្នាំប្រសិន​បើ​លោក​ទៅ​។​ ក្រុម​មន្ត្រី​បាន​និយាយ​ថា​ ទោះបីជា​ការពិគ្រោះ​យោបល់​បាន​បង្កើត​ នូវ​កម្រិត​នៃ​ការយោគយល់​គ្នា​ទៅវិញទៅមក កម្រិត​នៃ​វឌ្ឍនភាព​ត្រូវ​បាន​គេ​ចាត់ទុកថា​មិនទាន់​គ្រប់គ្រាន់ ​ដើម្បី​បង្ហាញ​ពី​សមិទ្ធផល​នៅ​ក្នុង​កិច្ចពិភាក្សា​កំពូល​នេះ​ទេ​។​

​ពួកគេ​បាន​បន្ថែម​ទៀត​ថា ​ការសម្រេចចិត្ត​នេះ​ក៏​ត្រូវ​បាន​ធ្វើ​ឡើង​ផង​ដែរ ​បន្ទាប់ពី​ពិចារណា​លើ​កាលៈទេសៈ​ផ្សេងៗ​។ ការិយាល័យ​បាន​និយាយ​ថា ​ភាគី​ទាំង២ បាន​រៀប​ចំ​កិច្ចចរចា​ប្រកបដោយ​អត្ថន័យ​ស្ដីពី​លទ្ធភាព​នៃ​កិច្ចប្រជុំ​កំពូល​នេះ បញ្ហា​ប្រវត្តិសាស្ត្រ និង​ការ​អភិវឌ្ឍ​តម្រង់​ទិសដៅ​នា​ពេល​អនាគត​នៃ​ទំនាក់ទំនង​របស់​ប្រទេស​ទាំង​២៕

អត្ថបទ៖ សុខមាន