ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា មនុស្សជាង ១.៥០០នាក់ ត្រូវបានសម្លាប់នៅក្នុងអំពើហឹង្សារបស់ក្រុមជនអន្ធពាលនៅក្នុងប្រទេសហៃទី រហូតមកដល់ពេលនេះ ក្នុងឆ្នាំនេះ។ សង្រ្គាមរបស់ក្រុមជនអន្ធពាលនៅប្រទេសហៃទី កាន់តែខ្លាំងឡើងក្នុងប៉ុន្មានសប្តាហ៍ថ្មីៗនេះ ដោយគូប្រជែងប្រដាប់អាវុធ បានរៀបចំសកម្មភាពវាយប្រហារជាបន្តបន្ទាប់ រួមទាំងការវាយឆ្មក់លើប៉ុស្តិ៍នគរបាល និងអាកាសយានដ្ឋានអន្តរជាតិ។ នាយករដ្ឋមន្រ្តី លោក អារីយ៉ែល ហង់រី(Ariel Henry) បានប្រកាសការលាលែងពីតំណែងកាលពីថ្ងៃទី ១១ ខែមីនា។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក វ៉ុលឃឺ ធឺក(Volker Turk) បាននិយាយនៅក្នុងសេចក្តីថ្លែងការណ៍ដែលបានចេញផ្សាយកាលពីថ្ងៃព្រហស្បតិ៍ រួមជាមួយរបាយការណ៍ដែលពិពណ៌នាអំពីស្ថានភាព «ដ៏មហន្តរាយ» នៅក្នុងប្រទេសថា ការប្រព្រឹត្តទាំងអស់នេះគឺជាបញ្ហាគួរឲ្យខឹងសម្បារ ហើយត្រូវតែបញ្ឈប់នៅពេលនេះ។ របាយការណ៍របស់អង្គការសហប្រជាជាតិ បានចងក្រងឯកសារពីការសម្លាប់មនុស្សចំនួន ៤.៤៥១នាក់ កាលពីឆ្នាំមុន និង ១.៥៥៤នាក់ រហូតដល់ថ្ងៃទី ២២ ខែមីនា។
របាយការណ៍និយាយថា បុគ្គលដែលត្រូវបានចោទប្រកាន់ពីបទឧក្រិដ្ឋ ឬសង្ស័យថាបានចូលរួមជាមួយក្រុមជនអន្ធពាល ត្រូវបានវាយដំ សម្លាប់ ឬដុតទាំងរស់ ដោយអង្គភាពស្វ័យការពារ។ ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា អង្គភាពប្រដាប់អាវុធ បំពេញចន្លោះសន្តិសុខដែលនៅសល់ពីនគរបាលដែលបានសម្លាប់មនុស្សចំនួន៥២៨នាក់ ជាអ្នកដែលត្រូវបានសង្ស័យថាមានទំនាក់ទំនងជាមួយក្រុមជនអន្ធពាលកាលពីឆ្នាំមុន និង៥៩នាក់នៅឆ្នាំនេះ។
របាយការណ៍ក៏បានពណ៌នាអំពីអំពើហឹង្សាផ្លូវភេទដ៏ច្រើនសន្ធឹកសន្ធាប់ រួមទាំងស្ត្រីដែលត្រូវបានបង្ខំក្នុងទំនាក់ទំនងផ្លូវភេទជាមួយសមាជិកក្រុមជនអន្ធពាល និងការចាប់រំលោភចំណាប់ខ្មាំង។
ការកើនឡើងនៃអំពើហឹង្សានាពេលថ្មីៗនេះ បានចាប់ផ្តើមនៅពេលដែលក្រុមជនអន្ធពាលបានរួមកម្លាំងគ្នា ចាប់ផ្តើមការវាយលុក និងទាមទារឱ្យ លោក Henry លាលែងពីតំណែង។
របាយការណ៍បានលើកឡើងថា ទោះបីជាមានការហាមឃាត់អាវុធពីអន្តរជាតិ ដើម្បីទប់ស្កាត់អំពើហិង្សាក៏ដោយ ក៏ការផ្គត់ផ្គង់អាវុធនិងគ្រាប់រំសេវ កំពុងមានលំហូរឆ្លងកាត់ព្រំដែនដ៏ផុយស្រួយរបស់ប្រទេសហៃទី។