ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានចូលរួមប្រជុំតាមប្រព័ន្ធអនឡាញ ជាមួយអង្គការស្បៀងអាហារ និងកសិកម្ម (FAO) ពាក់ព័ន្ធការងារមួយចំនួនក្នុងវិស័យកសិកម្ម។

 ប្រភពក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២៩ ខែមីនា ឆ្នាំ២០២៤នេះ បានឲ្យដឹងថា ក្នុងកិច្ចប្រជុំនេះ ឯកឧត្តមរដ្ឋមន្ត្រី បានសម្តែងនូវការស្វាគមន៍ និងសាទរ ចំពោះអង្គការ FAO ដែលបានលើកឡើងនូវគំនិតល្អៗ តាមរយៈការប្រើប្រាស់បច្ចេកវិទ្យាឌីជីថលសម្រាប់វិស័យកសិកម្ម។

ស្របពេលដែលសហគមន៍កសិកម្មទំនើបទើបចាប់ផ្តើម ករប្រើប្រាស់បច្ចេកវិទ្យានឹងជំរុញឱ្យដំណើរការការងារនេះកាន់តែប្រសិទ្ធភាពខ្ពស់ ជាពិសេសការផ្តល់និងទទួលបានព័ត៌មានរហ័ស ទាន់ពេលវេលា ពាក់ព័ន្ធនឹងបញ្ហាប្រឈមក្នុងកសិកម្មដល់សហគមន៍ ក៏ដូចជាកសិករ ដើម្បីដោះស្រាយបញ្ហាទាំងនោះបានទាន់ពេលវេលា ព្រមទាំងផលិតភាពផលិតកម្មកសិកម្ម។ 

បើតាម ឯកឧត្តមរដ្ឋមន្ត្រី ក្នុងបរិវត្តន៍កម្មឌីជីថលនេះ គឺចាំបាច់ត្រូវធ្វើទំនើបកម្ម និងសហការជំរុញការប្រើប្រាស់បច្ចេកវិទ្យាឌីជីថលដល់សហគមន៍កសិកម្មទំនើប ដើម្បីប្រសិទ្ធភាពការងារ និងភាពច្បាស់លាស់ជាក់លាក់។ ទន្ទឹមនឹងនេះដែរ ការអភិវឌ្ឍធនធានមនុស្ស ការបណ្តុះបណ្តាលពង្រឹងសមត្ថភាពលើការប្រើប្រាស់បច្ចេកវិទ្យានេះ គឺត្រូវយកចិត្តទុកដាក់ ដើម្បីយកទៅអនុវត្តឱ្យទទួលបានជោគជ័យល្អប្រសើរ៕ ដោយ ៖ បូរ៉ាវី