នេះគឺជាដីកសិកកម្មរបស់លោក Ismail Ibrahim ស្ថិតនៅក្រៅទីក្រុង Basra ភាគអាគ្នេយ៍ប្រទេសអ៊ីរ៉ាក់ ។ លោកធ្លាប់តែដាំដើមលម៉ើប៉ុណ្ណោះ ប៉ុន្តែដោយសារតែជួបវិបត្តិកង្វះខាតទឹក លោកក៏ងាកមកដាំដើមពុទ្រាបារាំងវិញ ។
លោក Ibrahim និយាយថា មិនដូចជាដើមលម៉ើទេ ដើមឈើហូបផ្លែពណ៌បៃតងនេះ ត្រូវការទឹកតិច អំឡុងវិបត្តិធារាសាស្រ្ត ហើយអាចរស់អាស្រ័យនឹងទឹកក្រោមដីមានជាតិប្រៃបានទៀតផង ។
ចំណែកឯបញ្ហាហិរញ្ញវត្ថុក៏ល្អប្រសើរផងដែរដោយសារតែដើមពុទ្រាបារាំងទាំងអស់នេះ ។
លោកនិយាយថា ដើមពុទ្រាបារាំង ចេញផ្លែ ចាប់ពីវាមានអាយុ ២ឆ្នាំឡើងទៅ មិនដូចជាដើមលម៉ើទេ ដែលចេញផ្លែយ៉ាងហោចណាស់ក៏វាមានអាយុ ៥ឆ្នាំដែរ ។
អ៊ីរ៉ាក់គឺជាផ្នែកមួយនៃតំបន់មានដីសម្បូរជីជាតិអាចបង្កបង្កើនផលបាន ចាប់ពីតំបន់មេឌីទែរ៉ាណេ រហូតដល់តំបន់ឈូងសមុទ្រ ដែលគេបានធ្វើកសិកម្មអស់រយៈពេលរាប់ពាន់ឆ្នាំមកហើយ ។
ប៉ុន្តែដីសម្បូរជីជាតិទាំងនេះ ត្រូវបានក្រៀមក្រោះដោយសារទំនប់ទឹកខ្សែខាងលើនៃទន្លេសំខាន់ចំនួន ២ គឺទន្លេ Tigris និងទន្លេ Euphrates ៕