នាយករដ្ឋមន្រ្តីប៉ូឡូញលោក Donald Tusk និយាយថា ប៉ូឡូញ និងអ៊ុយក្រែន ជិតឈានដល់កិច្ចព្រមព្រៀងលើការនាំចូលផលិតផលកសិកម្មពីទីក្រុងគីវ ក្រោយកិច្ចប្រជុំអន្តររដ្ឋាភិបាលនៅទីក្រុងវ៉ាសូវី មិនអាចដោះស្រាយបញ្ហាដែលបង្កឲ្យកើតមានបាតុកម្មរបស់ក្រុមប្រជាកសិករប៉ូឡូញ ។
លោក Tusk និងសមភាគីអ៊ុយក្រែនលោក Denys Shmyhal បាននិយាយយ៉ាងមុតមាំពីកិច្ចសហប្រតិបត្តិការប្រទេសរបស់ពួកគេ ភាពលំបាកនៃកិច្ចព្រមព្រៀងដើម្បីបិទគំលាតរវាងគោលជំហរទីក្រុងវ៉ាសូវី និងទីក្រុងគីវលើការនាំចូលផលិតផលកសិកម្មអ៊ុយក្រែន ដែលបានធ្វើឲ្យជាប់គាំងដល់ទំនាក់ទំនងរបស់ពួកគេ ។
ក្រុមប្រជាកសិករប៉ូឡូញ បានបិទផ្លូវហាយវ៉េ និងផ្លូវឆ្លងកាត់ព្រំដែនជាមួយអ៊ុយក្រែន និងបានធ្វើឲ្យទីក្រុងគីវ ខឹងសម្បារយ៉ាងខ្លាំង ក្រោយពួកគេចាក់ចោលគ្រាប់ធុញ្ញជាតិអ៊ុយក្រែនពីលើទូរថភ្លើង ពេលដែលពួកគេទាមទារឲ្យយកពន្ធគយឡើងវិញលើការនាំចូលកសិកម្មពីអ៊ុយក្រែន ដែលត្រូវបានគេលើកលែងពន្ធ ក្រោយការវាយលុករបស់រុស្ស៊ី កាលពីឆ្នាំ ២០២២ ។
ទីក្រុងគីវ និយាយថា បាតុកម្មនេះ បានធ្វើឲ្យប៉ះពាល់ដល់សេដ្ឋកិច្ចរបស់ពួកគេ និងកិច្ចខិតខំធ្វើសង្រ្គាមប្រឆាំងការវាយលុករបស់រុស្ស៊ី ៕