ដោយប្រឈមនឹងភាពស្រេកឃ្លាន និងអស់សង្ឃឹមខ្លាំង ជនប៉ាឡេស្ទីន បានចំណាយថ្ងៃរបស់ពួកគេរត់ដេញតាមយន្តហោះក្នុងទីក្រុងហ្កាហ្សា ដោយសង្ឃឹមថានឹងអាចស្វែងរកឃើញចំណីអាហារទទួលទានបាន ។ 

ការផ្គត់ផ្គង់ជំនួយនៅក្នុងតំបន់ហ្កាហ្សា បានកាត់បន្ថយភ្លាមៗ ចាប់តាំងពីសង្រ្គាមផ្ទុះឡើង ធ្វើឲ្យពលរដ្ឋរស់នៅក្នុងដែនដីបិទច្រកមួយនេះ ស្ទើតែដាច់ពោះស្លាប់ទាំងស្រុង ដោយសារតែពួកគេគ្មានស្បៀងអាហារ ។ 

ធ្វើដំណើរពីមួយកន្លែងទៅកាន់មួយកន្លែងទៀត លោក Ahmed Tafesh គឺជាពលរដ្ឋមួយរូបរស់នៅក្នុងតំបន់ហ្កាហ្សា បានរត់ដេញតាមយន្តហោះដែលលោកបានមើលឃើញនៅលើអាកាស ។ 

លោក Tafesh និយាយថា ពួកយើងព្យាយាម ២លើកនៅព្រឹកនេះ ប៉ុន្តែអត់ទទួលបានអ្វីនោះឡើយ ។ បើសិនជាពួកយើងអាចទទួលបានសណ្តែកមួយកំប៉ុង ដើម្បីទទួលទាន វាមិនដឹងជាល្អបែបណានោះទេ ។ 

លោកបន្តថា ពួកយើងសង្ឃឹមថា ពួកយើងនឹងអាចមានចំណីទទួលទាននៅថ្ងៃនេះ ។ មនុស្សភាគច្រើនស្រេកឃ្លានខ្លាំងណាស់ ពួកគេគ្មានកម្លាំងកំហែងនោះទេ ៕