ប្រព័ន្ធផ្សព្វផ្សាយក្នុងស្រុកបាននិយាយកាលពីថ្ងៃអាទិត្យថា អ្នកនាំពាក្យរដ្ឋាភិបាលចាំផ្ទះរបស់ប្រទេសអាហ្វហ្គានីស្ថាន លោក ហ្សាប៊ីហ៊ុលឡា មូចាហ៊ីដ(Zabihullah Mujahid) បានបញ្ជាក់ពីការឃុំខ្លួនជនជាតិអាមេរិកពីរនាក់ នៅក្នុងប្រទេសអាហ្វហ្គានីស្ថាន។

វិទ្យុ និងទូរទស្សន៍ជាតិប្រទេសអាហ្វហ្គានីស្ថាន បានដកស្រង់សម្តី លោក Mujahid កាលពីថ្ងៃអាទិត្យថា ជនបរទេសមួយចំនួនរួមទាំងជនជាតិអាមេរិកពីរនាក់ ត្រូវបានឃុំខ្លួនក្នុងប្រទេសអាហ្វហ្គានីស្ថាន ហើយហេតុផលសម្រាប់ការជាប់ពន្ធនាគាររបស់ពួកគេ គឺជាការរំលោភលើច្បាប់របស់ប្រទេសអាហ្វហ្គានីស្ថាន។

ដោយពុំផ្តល់ព័ត៌មានលម្អិតបន្ថែម មន្ត្រីរូបនេះបាននិយាយថា នរណាម្នាក់ដែលទទួលបានទិដ្ឋាការអាហ្វហ្គានីស្ថាន ហើយចូលមកប្រទេសនេះ ត្រូវមានកាតព្វកិច្ចគោរពច្បាប់ទឹកដីរបស់ប្រទេសនេះ។

លោក Mujahid បានបញ្ជាក់ថា នៅប្រទេសផ្សេងទៀត ប្រសិនបើជនជាតិអាហ្វហ្កានីស្ថាន បំពានច្បាប់ ពួកគេប្រាកដជាត្រូវបានចាប់ខ្លួន។

អ្នកនាំពាក្យរបស់រដ្ឋបាលប្រទេសអាហ្វហ្គានីស្ថាន បាននិយាយដូច្នេះក្នុងពេលមានរបាយការណ៍ថាមនុស្សមួយចំនួននៅក្នុងសហរដ្ឋអាមេរិក បាននឹងកំពុងស្នើសុំឱ្យប្រធានាធិបតី លោក Joe Biden ធានាឱ្យមានការដោះលែងជនជាតិអាមេរិក ដែលត្រូវបានឃុំខ្លួននៅក្នុងប្រទេសអាហ្វហ្គានីស្ថាន និងនាំយកពួកគេត្រឡប់ទៅប្រទេសកំណើតរបស់ពួកគេវិញ។