ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំ​ដល់​និស្សិត​ពិនិត្យ​ពិចារណា​ឱ្យបានល្អិតល្អន់ ចំពោះមុខជំនាញដែលបានជ្រើសរើស ដោយត្រូវជ្រើស​សិក្សា​មុខ​ជំនាញ​ដែល​ខ្លួនចូលចិត្ត ហើយអាចធានាបាននូវមុខរបរ ឬការងារសមរម្យ ដើម្បីទ្រទ្រង់​ជីវភាព និងរួមចំណែកជួយអភិវឌ្ឍវិស័យកសិកម្ម នៅពេលរៀនចប់។

ក្នុងឱកាសអញ្ជើញជាអធិបតីក្នុងពិធីបើកបវេសនកាលឆ្នាំសិក្សា២០២៣-២០២៤ របស់​វិទ្យា​ស្ថាន​​ជាតិ​កសិកម្មកំពង់ចាម កាលពីរសៀលថ្ងៃទី១ ខែមេសា ឆ្នាំ២០២៤នេះ ឯកឧត្តម​រដ្ឋ​មន្រ្តី ​បាន​ជំរុញឱ្យនិស្សិតទាំងនោះ ជ្រើសរើសសិក្សាមុខជំនាញក្នុងវិស័យកសិកម្ម ដែល​មាន​ដូច​ជា ជំនាញវិទ្យាសាស្ត្រកសិកម្ម វិទ្យាសាស្ត្រនិងវេជ្ជសាស្ត្រសត្វ វិទ្យាសាស្ត្រជលផល និង​ជំនាញ​សេដ្ឋកិច្ច និង​គ្រប់គ្រងកសិកម្មជាដើម។ 

ឯកឧត្តមរដ្ឋមន្រ្តី បានមានប្រសាសន៍ទៀតថា បន្ថែមលើមុខ​ជំនាញ​គោល​នៅ​ក្នុង​កម្ម​វិធី​សិក្សា​សព្វ​ថ្ងៃ​នេះ ប្អូនៗនិស្សិតត្រូវតែពង្រឹងសមត្ថភាពភាសាអង់គ្លេស និងកំព្យូទ័រ ព្រមទាំង​ជំនាញ​ផ្នែក​សេដ្ឋកិច្ច​បន្ថែមទៀត ដើម្បីចាប់យកឱកាសទៅហាត់ការនៅបរទេស ដើម្បីទទួលបានបទពិសោធ ឆ្លើយ​តបទៅនឹងតម្រូវការទីផ្សារការងារ។

ឯកឧត្តមរដ្ឋមន្ដ្រី ក៏បានយកឱកាសនេះ ពន្យល់ដល់ប្អូនៗ​និស្សិត​អំពី​គោល​នយោបាយ​កសិកម្ម​របស់​រាជ​រដ្ឋាភិបាល ដែលផ្ដោតសំខាន់លើការធានាឱ្យបាននូវសន្តិសុខស្បៀង និងនិរន្តរភាព​សេដ្ឋកិច្ច និង​បរិស្ថាន តាមរយៈកាត់បន្ថែមថ្លៃដើមផលិត និងការផលិតបែបគុណភាព តម្រូវ​តាម​ទីផ្សារ ព្រមទាំងមានតម្លៃបន្ថែមខ្ពស់។ ជារួម គឺធ្វើយ៉ាណាដើម្បីឱ្យប្រជាកសិករ និងប្រជាជន​ទាំង​អស់ មានហូប មានបាន មានប្រើ និងមានរហូត៕ អត្ថបទ៖ ឈិត បូរ៉ាវី