ក្រុមការងារនៃរដ្ឋបាលខេត្តកណ្តាល បាននិងកំពុងធ្វើការងារញាប់ដៃជើង រៀបចំ​តុបតែង​លម្អ​ទីតាំង​នានា ដើម្បីបំពាក់សម្ភារៈ វប្បធម៌ រូបសំណាក ធ្វើឆាកប្រគំតន្ត្រី និងហាត់​សម​សិល្បៈ​វប្បធម៌​នៅក្នុ​ងខេត្តរបស់ខ្លួន ដើម្បីត្រៀមចូលបង្ហាញ​ក្នុង​កម្ម​វិធីសង្ក្រាន្ត​ខេត្ត​កណ្តាល​រយៈ​ពេល​៤​ថ្ងៃ អបអរសាទរពិធីបុណ្យចូលឆ្នាំប្រពៃណីខ្មែរ ដែលនឹងឈានចូលនៅក្នុងថ្ងៃទី១៣ ខែ​មេសា​នេះ​។

លោក ធឹម សំអុល អនុប្រធានមន្ទីរវប្បធម៌ និងវិចិត្រសិល្បៈខេត្តកណ្តាល បានថ្លែងប្រាប់ BTV នៅ​ថ្ងៃទី២ ខែមេសានេះថា កម្មវិធីសង្ក្រាន្តខេត្តកណ្តាលឆ្នាំរោងនេះ រដ្ឋបាលខេត្ត បាន​រៀប​ចំ​កម្ម​វិធី​កម្សាន្ត​សប្បាយបង្ហាញទម្រង់សិល្បៈវប្បធម៌នៅក្នុងខេត្តរបស់ខ្លួនច្រើនជាងបណ្តាឆ្នាំកន្លងមក ហើយ​អ្វី​ដែលខេត្តបង្កើនការរៀបចំនោះ រួមមាន ការរៀបចំសួនត្រជាក់ កីឡាប្រដាល់លើទឹក បង្ហោះ​កូប បណ្តែតប្រទីប រៀបចំរូបសំណាកនាគរាជធ្វើពីស្លឹកត្នោត និងតាំងលម្អរភ្លើងពណ៌ បង្ហាញ​ទម្រង់សិល្បៈវប្បធម៌ប្រចាំខេត្ត ប្លែកៗទៀតជាច្រើនទៀត។

បណ្តាពលរដ្ឋ បានបង្ហាញការចាប់អារម្មណ៍ និងមានចិត្តសប្បាយជាបណ្តើរៗ ខណៈ​ដែល​កម្ម​វិធី​សង្ក្រាន្ត អបអរសាទរពិធីបុណ្យចូលឆ្នាំថ្មី ប្រពៃណីខ្មែរជិតឈានចូលមកដល់ ហើយក្នុង​ឱកាស​ការ​រៀបចំ​កម្ម​វិធី​សង្ក្រាន្ត​ឆ្នាំ​នេះ គឺយើងនឹងនាំគ្នា ទៅលេងកម្សាន្តសប្បាយកម្មវិធីសង្ក្រាន្ត នៅ​ក្នុង​សួន​មាត់​ទន្លេ​បាសាក់​ស្ថិតនៅក្នុងក្រុងតាខ្មៅ។

ទន្ទឹមនឹងនេះ រដ្ឋបាលខេត្តកណ្តាល ក៏បានអំពាវនាវពលរដ្ឋ អាជ្ញាធរមូលដ្ឋាន សហការ រៀប​ចំ​សង្ក្រាន្ត​តាមភូមិឃុំសង្កាត់របស់ខ្លួនឲ្យបានច្រើនដូចបណ្តាឆ្នាំមកកន្លងមក ដើម្បី​បង្កើន​ឱកាស​ផ្តល់​ភាព​សប្បាយ​រីករាយជូនបណ្តាពលរដ្ឋនៅក្នុងមូលដ្ឋានរបស់ខ្លួនផងដែរ។

សូមបញ្ជាក់ថា សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានជំ​រុញ​ឲ្យ​រដ្ឋបាល​រាជ​ធានី​ខេត្ត​ទាំងអស់រៀបចំកម្មវិធីសង្ក្រាន្តអបអរសាទរពិធីបុណ្យចូលឆ្នាំថ្មី ប្រពៃណីខ្មែរ​ឲ្យ​បាន​អធិក​អធម និងណែនាំដល់ក្រសួងវប្បធម៌ និងវិចិត្រសិល្បៈ រៀបចំឯកសារ​បញ្ចូល​សង្ក្រាន្ត​កម្ពុជា​ទៅ​ក្នុង​បញ្ជី​សម្បត្តិ​បេតិកភណ្ឌ​វប្បធម៌អរូបិយរបស់មនុស្សជាតិនៃអង្គការយូណេស្កូផងដែរ៕ អត្ថបទ ស៊ុម សុខជា