​អូស្ត្រាលី​៖ ប្រជាពលរដ្ឋ​អូស្ត្រាលី​ជាង ​១៣​លាន​នាក់ប្រហែល​ចំនួន​ពាក់កណ្ដាល​នៃ​ប្រជាជន​សរុបកំពុង​ស្ថិត​ក្នុង​វិធាន​ការ​បិទ​ខ្ទប់ បន្ទាប់ពី​រដ្ឋ​ទី​៣ បាន​អនុវត្ត​វិធានការ​រឹតត្បិត​នានា ​ដើម្បី​បញ្ឈប់​ការ​ផ្ទុះ​រាលដាល​វីរុស​ប​ម្លែ​ង​ខ្លួន​ថ្មី Delta​។

​រដ្ឋ South Australia ដែល​ជា​ផ្ទះ​របស់​ប្រជាពលរដ្ឋ​ចំនួន ​១​លាន ​៧​សែន​នាក់​ដែល​បាន​ចូលរួម​ជាមួយ​រដ្ឋ Victoria និងតំបន់​ខ្លះ​នៃ​រដ្ឋ New South Wales កំពុង​ស្ថិត​ក្នុង​វិធាន​ការ​បិទ​ខ្ទប់​បង្ការ​ការ​ឆ្លង​រាលដាល​ជំងឺ ​COVID-19 ​កាលពី​ថ្ងៃ​អង្គារ​។​ ប្រជាពលរដ្ឋ​តំបន់​នេះ​នឹង​ត្រូវ​ស្នាក់នៅ​ក្នុង​ផ្ទះ​រយៈពេល ៧​ថ្ងៃបន្ទាប់ពី​រក​ឃើញ​ករ​ណី​ឆ្លង​ចំនួន ៥​នាក់។​ កំហឹង​នៅ​ក្នុង​ប្រទេស​អូស្ត្រាលី​កំពុងតែ​កើន​ឡើង​ ជុំវិញ​យុទ្ធសាស្ត្រ​នៃ​ការ​បិទ​ខ្ទប់​ក្នុង​នោះ​ទីក្រុង​ធំ​ៗ​ពីរ​គឺ Sydney និង​Melbourne កំពុង​ប្រឈម​នឹង​ភាព​មិន​ប្រាកដប្រជា ដោយ​ពុំ​ដឹង​ថា​នឹង​បើក​នៅ​ពេល​ណា​។​

​ការ​បិទ​ខ្ទប់​ត្រូវ​បាន​យាមកាម​យ៉ាង​តឹងរ៉ឹង​ ពី​សំណាក់​កងកម្លាំង​នគរបាល​ដើម្បី​ធានា​ថា ​ប្រជាពលរដ្ឋ​បាន​អនុវត្តន៍​វិធានការ​ទាំងនេះ​យ៉ាង​ខ្ជាប់ខ្ជួន​។​ រហូត​មក​ដល់ពេល​ថ្មីៗ​នេះ ប្រទេស​អូស្ត្រាលី​ត្រូវ​បាន​គេ​កោតសរសើរ​យ៉ាង​ខ្លាំង ​ចំពោះ​យុទ្ធសាស្ត្រ​របស់​ខ្លួន​ក្នុង​ការ​បិទ​ព្រំដែន កម្មវិធី​ដាក់​ឲ្យ​នៅ​ដាច់​ដោយ​ឡែក និង​ការ​បិទ​ខ្ទប់​ភ្លាមៗ​បាន​ទាន់​ពេល​វេលា។​ ប្រទេស​អូស្ត្រាលី​មាន​អ្នក​ឆ្លង​វីរុស​កូ​រ៉ូ​ណា​ចំនួន ៣២,២៦៦​នាក់បន្ទាប់ពី​មាន​ករណី​ឆ្លង​ថ្មី​ចំនួន ១៣៧​នាក់ ខណៈ​អ្នក​ស្លាប់​មាន ៩១៥​នាក់​៕​

អត្ថបទ៖ សុខមាន