បន្ទាយមានជ័យ៖ អភិបាលស្រុកភ្នំស្រុក លោក យឹម សំណាង បានឱ្យដឹងនៅថ្ងៃទី២១ ខែកក្កដាថា ក្នុងអំឡុងពេលដឹកនាំកំលាំង និង​មន្រ្តី​ជំនាញចុះពិនិត្យជាក់ស្តែងដល់ផ្ទះប្រជាពលរដ្ឋដែលមានគោ កើតជំងឺដុំពកស្បែក នៅស្រុកភ្នំស្រុក ខេត្តបន្ទាយមានជ័យឃើញថា មានគោជាច្រើនក្បាលបានឆ្លងជំងឺនេះ ដែលភាគច្រើនឆ្លងតាមរយៈសត្វល្អិត មានដូចជាមូស រុយ ឬ ដង្កូវ ដែលមាននៅក្នុងក្រោលគោ និងតាមរយៈការនាំគោ ក្របី ដែលមានជំងឺពីតំបន់ផ្សេងៗ ហើយអាចឆ្លងតាមរយៈការស៊ីចំណី ផឹកទឹករួមគ្នា ទឹកដោះ ការបង្កាត់ពូជ និងការព្យាបាល(បើមិនដូរម្ជុល) ឬ ការប៉ះពាល់ផ្ទាល់។

លោក ក៏បានសំណូមពរដល់ប្រជាពលរដ្ឋដែលមាន គោ ក្របី កើតជំងឺដុំពកស្បែក ត្រូវដឹងថា ជំងឺនេះពុំមានថ្នាំព្យាបាលឱ្យមាន​ប្រសិ​ទ្ធ​ភាព​​នោះ​ទេ។ តែយើងអាចពិនិត្យតាមដាន គោ ក្របី ជារៀងរាល់ថ្ងៃ ក្នុងអំឡុងពេលផ្ទុះជំងឺ ឬ នៅក្នុងតំបន់​ដែល​មាន​ហានិភ័យ​នៃជំងឺ។

បើមានសង្ស័យ សូមរាយការណ៏ជាបន្ទាន់ដល់ភ្នាក់ងារបសុពេទ្យដែលនៅជិតបំផុត។ ជំងឺនេះមិនឆ្លងមកមនុស្សនោះទេ វា​កើត​ឡើងតាម​រដូវកាល​តែប៉ុណ្ណោះ៕