ភ្នំពេញ៖ សំណើសុំ ០៣ចំណុច របស់ក្រុមអ្នកតវ៉ា គឺមិនអាចដោះស្រាយ​តាមសំណូមពរ​បាន​នោះ​ឡើយ។ នេះ​បើតាម​សេចក្ដី​ប្រកាស​ព័ត៌​មានរបស់ក្រសួងសាធារណការ និងដឹកជញ្ជូន ចេញ​​​នៅ​ថ្ងៃទី​២១ ​ខែកក្កដា។

សូម​រម្លឹកដែរថា កាលពីថ្ងៃទី២០ ខែកក្កដា ឆ្នាំ២០២១ មានម្ចាស់រថយន្ត ឬ អ្នក​បើកបរ​រថយន្ត​ធុន​​​ធ្ងន់ បានប្រមូលផ្ដុំគ្នាតវ៉ា នៅ​តាម​បណ្ដោយ​ផ្លូវក្រវាត់ក្រុងទី២ ដោយបានដាក់សំណើចំនួន ៣ចំណុចក្នុងនោះមានដូចជា៖

១.ស្នើសុំដំឡើងទម្ងន់ ឬដឹកជញ្ជូនលើសទម្ងន់ក្នុងចន្លោះចាប់ពី ៩តោនទៅ ១៥តោនតាម​ប្រភេទ​​រថយន្តធុនធ្ងន់ បន្ថែមពីលើទម្ងន់នៃច្បាប់បានកំណត់។

២.ស្នើសុំត្រឹមផាកពិន័យ ដោយមិនចាំបាច់ឃាត់ទុករថយន្តមួយឆ្នាំ ក្នុងករណីផ្ទុកទម្ងន់លើសពី ២០ ភាគរយឡើង។

៣.ស្នើសុំផ្ដល់រថយន្តដែលបានឃាត់ទុកកន្លងមក ឱ្យទៅម្ចាស់ក្រុមហ៊ុន ឬម្ចាស់រថយន្តវិញ ដោយ គ្រាន់តែផាកពិន័យ និងមិនចាំបាច់ឃាត់ទុករថយន្តបន្តទៀត។

សេចក្ដីប្រកាសព័ត៌មានរបស់ក្រសួងសាធារណការ​ និងដឹកជញ្ជូនដដែលបញ្ជាក់បន្ថែមថា សំ​ណើ​ទាំ​ង​នេះ គឺផ្ទុយនឹងបទបញ្ញត្តិ​ដូច​មាន​ចែងក្នុងមាត្រា២៦ និងមាត្រា៦០ នៃច្បាប់​ស្ដីពី​ផ្លូវ​ថ្នល់ និងលិខិតបទ ដ្ឋានគតិយុត្តជាធរមាន។

ក្រសួង ក៏បានស្នើដល់ម្ចាស់ក្រុមហ៊ុនដឹកជញ្ជូន ម្ចា​ស់​រថយន្តធុនធ្ងន់ ឬ អ្នក បើកបររថយន្ត​ធុន​ធ្ងន់ គួរតែចូលរួម​សហការ​អនុវត្ត​វិធាន​ការច្បាប់​ទាំង​អស់គ្នា ដើម្បីធានាការពារទ្រព្យ សម្បត្តិ​សា​ធារ​ណៈ ផ្លូវថ្នល់ ស្ពាន និងសំណង់​សិល្បការ្យ​ផ្លូវឱ្យស្ថិតស្ថេរគង់វង្ស និង​ជាប់​រឹង​មាំ​តាមអាយុ​​កាលបច្ចេកទេសកំណត់ ស្របតាមក​ម្រិត​ស្តង់​ដារ នៃការសាងសង់ ហើយក៏អាចចូលរួម​ចំណែក កាត់បន្ថយការ​ចំណាយ​​​​ថវិកាជាតិ លើ​ការ​ជួ​ស​​ជុល​ថែទាំហេដ្ឋារចនាសម្ព័ន្ធផ្លូវថ្នល់ ដែល​​ខូចខាត ដោយសារការ​ដឹកជញ្ជូនលើស​ទម្ងន់​កម្រិ​ត​កំណត់។

សេចក្ដី​ប្រកាសព័ត៌មានដដែលបន្ថែមថា កន្លងមក គណៈកម្មាធិការដឹកនាំការត្រួត​ពិនិត្យ​យាន​យ​ន្ត​​ដឹក ជញ្ជូនលើសទម្ងន់​កម្រិត​កំណ​ត់​​ក៏បានផ្សព្វផ្សាយអប់រំណែនាំច្បាប់ លិខិតបទដ្ឋាន​គ​តិ​​យុត្ត និងទុកពេលវេលាសមស្រប មុននឹងដាក់ចេញនូវវិធាន​ការ​តឹងរ៉ឹង​តាម​បទ​បញ្ញត្តិ​ច្បាប់​ជា​​​ធរ​​មានផងដែរ៕​ដោយ៖ គង់ ឌិន