ឥណ្ឌា៖ ក្មេងប្រុសអាយុ ១១ឆ្នាំម្នាក់បានស្លាប់នៅក្នុងប្រទេសឥណ្ឌា ដោយសារវីរុសផ្តាសាយបក្សី H5N1 ជាការស្លាប់ដំបូងនៅក្នុងប្រទេសនេះ ដែលបង្ហាញពីហានិភ័យថ្មីដែលអាចកើតមានសម្រាប់ប្រទេសមានប្រជាជនច្រើនបំផុតទី២ នៅលើពិភពលោកមួយនេះ ខណៈកំពុងប្រយុទ្ធប្រឆាំងនឹងវីរុសរាតត្បាតសកលកូរ៉ូណា។
សេចក្ដីថ្លែងការណ៍របស់រដ្ឋាភិបាលបាននិយាយថា ក្មេងប្រុសរូបនេះត្រូវបានបញ្ជូនទៅព្យាបាលនៅវិទ្យាស្ថានវេជ្ជសាស្ត្រឥណ្ឌា នៅទីក្រុងញូវដេលីកាលពីថ្ងៃទី២ ខែកក្កដា និងបានស្លាប់កាលពីថ្ងៃអង្គារ (២០ កក្កដា) បន្ទាប់ពីសរីរាង្គជាច្រើនគាំងលែងដំណើរការ។ សេចក្តីថ្លែងការណ៍បាននិយាយថា បុគ្គលិកសុខាភិបាលដែលព្យាបាលអ្នកជំងឺរូបនេះ និងក្រុមគ្រួសាររបស់ក្មេងប្រុសត្រូវបានដាក់ឲ្យនៅដាច់ដោយឡែក ហើយក្រុមអាជ្ញាធរបានតាមដានការទាក់ទងនឹងវីរុសនេះ។
នៅក្នុងរដ្ឋ Haryana ដែលជារដ្ឋកំណើតរបស់ក្មេងប្រុសនៅភាគខាងជើងប្រទេសឥណ្ឌា នាយកដ្ឋានបសុព្យាបាលមិនបានរកឃើញករណីសង្ស័យថា មានជំងឺផ្តាសាយបក្សីទេ ហើយបានបង្កើនការតាមដាន។ ប្រទេសឥណ្ឌាបានមើលឃើញការផ្ទុះឡើង នូវជំងឺផ្តាសាយបក្សីជាងពាក់កណ្ដាលនៃសត្វបក្សីនៅក្នុងរយៈពេល ២ទសវត្សចុងក្រោយនេះ ដែលទាំងអស់ត្រូវបានគ្រប់គ្រងដោយគ្មានករណីឆ្លង លើមនុស្សណាម្នាក់ធ្លាប់ត្រូវបានរាយការណ៍នៅក្នុងប្រទេសនេះទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
