ព្រះសីហនុ៖ នៅថ្ងៃទី៥ ខែមេសា ឆ្នាំ២០២៤ មេបញ្ជាការរងទីបញ្ជាការជួរមុខ អគ្គ​លេខាធិការដ្ឋាន​ នៃគណៈកម្មាធិការជាតិសន្ដិសុខលម្ហសមុទ្រ ប្រាប់ឱ្យដឹងថា មាននាវាចម្បាំង​កងទ័ព​​ជើង​ទឹកភូមិន្ទ​ថៃ​​ មួយគ្រឿង​ បានចូលចតដល់កំពង់ផែស្វយ័ត​ក្រុងព្រះសីហនុ​ ​ក្នុង​គោល​បំណង​លើក​កម្ពស់ចំណងមិត្តភាពល្អ និងពង្រីកកិច្ច​សហប្រតិបត្តិការ​ទ្វេភាគី​រវាង​កង​ទ័ព​ជើងទឹក​ភូមិន្ទ និង​កម្ពុជាភាគីរវាងកងទ័ពជើងទឹកទាំងពីរកម្ពុជា-ថៃ នៅព្រះរាជាណាចក្រកម្ពុជា រយៈពេល០៣ថ្ងៃ (០៥-០៧ ខែមេសា) ។

លោកឧត្ដមនាវីទោ ស្វាយ សុន្ធី បន្ដថា ​លក្ខណៈ​បច្ចេកទេស​នាវា ​ ​ឈ្មោះ HTMS BANGPAKONG (FFG-456) មានបណ្ដោយ ១០៣ម៉ែត្រ ទទឹងជាង ១១ម៉ែត្រ ​ជម្រៅ​ទឹកជាង ៤ម៉ែត្រ ​ទំងន់​ផ្ទុកជាង ២.០០០តោន មាន​ចំនួន​នាវិក ២៦២នាក់​ មានមេបញ្ជាការ​នាវា លោក​វរនាវីឯក SIRAPOP THANANUNTACHOD  ដែលប្រធាន​ប្រតិភូដឹកនាំ លោកវរនាវីឯក ASOKE SRISAWAT នាយរងសេនាធិការកងទ័ព​ជើង​ទឹកភូមិន្ទថៃ ភូមិភាគ​១។

លោកឧត្ដមនាវី បន្ថែមថា ក្នុងដំណើរទស្សនកិច្ចសហប្រតិបត្ដិការនេះ បន្ទាប់​បដិ​សណ្ឋាកិច្ច​រវាង​កង​ទ័ព​ជើងទឹកភូមិន្ទកម្ពុជា មូលដ្ឋានសមុទ្ររាម និងកងទ័ពជើងទឹកភូមិន្ទថៃ នៅចំណត​កំពង់​ផែ​រួ​ចប្រធាន​ប្រតិភូដឹកនាំ លោកវរនាវីឯក ASOKE SRISAWAT ដឹកនាំក្រុមការងារ ជួប​សម្ដែង​ការ​គួរសម​ជាមួយរដ្ឋបាលខេត្ដព្រះសីហនុ បន្ទាប់មក​ទៅ​បញ្ជា​ការដ្ឋាន​កងទ័ព​ជើង​ទឹក​មូលដ្ឋាន​សមុទ្រ​រាម​រួច បន្ដដំណើរទៅទីបញ្ជាការដ្ឋានកងទ័ពជើងទឹករាជធានីភ្នំពេញ ទៅ​ស្ថានទូតថៃ​ប្រចាំ​នៅ​ព្រះរាជាណាចក្រកម្ពុជា ទស្សនារមណីយដ្ឋានវប្បធម៌នានា ។ល។