ប្រទេសនូវែលហ្សេឡង់ នៅថ្ងៃសុក្រ ទី៥ ខែមេសានេះ បាននិយាយថា ខ្លួនបានត្រៀមខ្លួនជាស្រេចដើម្បីចុះហត្ថលេខាលើកិច្ចព្រមព្រៀងសហប្រតិបត្តិការថ្មីជាមួយសម្ព័ន្ធយោធាណាតូ ខណៈប្រទេសនេះគិតឡើងវិញអំពីសន្តិសុខ នៅពេលប្រឈមមុខទៅនឹងភាពតានតឹងក្នុងតំបន់ និងការកើនឡើងកម្លាំងយោធារបស់ប្រទេសចិន។ រដ្ឋមន្ត្រីការបរទេស លោក Winston Peters បាននិយាយបន្ទាប់ពីដំណើរទស្សនកិច្ចរយៈពេលពីរថ្ងៃទៅកាន់ទីស្នាក់ការរបស់សម្ព័ន្ធយោធាណាតូ នៅទីក្រុងព្រុចសែលថា កម្មវិធីភាពជាដៃគូ ជាមួយសម្ព័ន្ធមិត្ត នឹងត្រូវបានព្រមព្រៀង ក្នុងប៉ុន្មានខែខាងមុខនេះ។

ចាប់តាំងពីគណបក្សចម្រុះស្តាំនិយម បានជាប់ឆ្នោតកាលពីខែតុលាឆ្នាំមុន ប្រទេសនូវែលហ្សេឡង់ ដែលមានឯករាជ្យយ៉ាងខ្ជាប់ខ្ជួន បានសម្លឹងទៅរកការធ្វើឱ្យកាន់តែស៊ីជម្រៅនូវទំនាក់ទំនងយោធាជាមួយសម្ព័ន្ធមិត្តប្រទេសលោកខាងលិចជាប្រពៃណី។ លោក Peters និយាយថា រដ្ឋាភិបាលចម្រុះ បានបញ្ជាក់ច្បាស់ថា ខ្លួនបានដាក់កិច្ចសហប្រតិបត្តិការជាមួយដៃគូជាប្រពៃណីរបស់ប្រទេសនូវែលហ្សេឡង់ ហើយសម្ព័ន្ធយោធាណាតូជាផ្ណែកដ៏ធំនៃកិច្ចសហប្រតិបត្តិការនោះ។

ប្រទេសនូវែលហ្សេឡង់ មានភាពជាដៃគូជាមួយសម្ព័ន្ធយោធាណាតូ ចាប់តាំងពីឆ្នាំ ២០១២ ប៉ុន្តែកិច្ចព្រមព្រៀងថ្មីនេះ ត្រូវបានគេរំពឹងថានឹងជំរុញឱ្យមានភាពជាដៃគូយុទ្ធសាស្ត្រកាន់តែជិតស្និទ្ធ។ ទីក្រុង Wellington ក៏កំពុងសម្លឹងមើលការចូលរួមក្នុងការស្រាវជ្រាវរួមគ្នាជាមួយប្រទេសអូស្ត្រាលី សហរដ្ឋអាមេរិក និងចក្រភពអង់គ្លេស ក្នុងការប្រើប្រាស់បញ្ញាសិប្បនិមិត្តផ្នែកយោធា អាវុធមានល្បឿនលឿនជាងសំឡេង និងបច្ចេកវិទ្យាដែលកំពុងរីកចម្រើនផ្សេងទៀត។

ចាប់តាំងពីសង្គ្រាមលោកលើកទី ២ មក ប្រទេសនូវែលសេឡង់ បានក្លាយជាផ្នែកមួយនៃសម្ព័ន្ធមិត្តចែករំលែកព័ត៌មានសម្ងាត់ FiveEyes ជាមួយប្រទេសអូស្ត្រាលី កាណាដា ចក្រភពអង់គ្លេស និងសហរដ្ឋអាមេរិក។ ប៉ុន្តែពេលខ្លះជាសម្ព័ន្ធមិត្តដែលមិនងាយស្រួលនោះទេ នៅពេលនិយាយដល់បញ្ហាយោធា។