​អូឡាំពិក​៖ ​ស្រប​ពេល​ដំណើរ​រៀបចំ​ព្រឹត្តិការណ៍​អូឡាំពិក​ទីក្រុង​តូ​ក្យូ​ប្រទេស​ជប៉ុន ជួប​នឹង​ឧបសគ្គ​ជាច្រើន​ជាពិសេស​ពាក់ព័ន្ធនឹង​ជំងឺ​រាតត្បាត Covid-19 នោះ ជប៉ុន​ត្រូវ​ប្រឈម​នឹង​បញ្ហា​មួយទៀត​បន្ទាប់ពី​ដក​តំណែង​នាយក​គ្រប់គ្រង​ ការរៀបចំ​ផ្នែក​សិល្បៈ​ក្នុង​កម្មវិធី​បើក​ លោក Kentaro Kobayashi ត្រូវ​បាន​ដកចេញ​ពី​តួនាទី​។

​​ពិធី​បើក​ព្រឹត្តិការណ៍​ជា​ផ្លូវ​នឹង​ចាប់ផ្តើម​នៅ​ថ្ងៃ​សុក្រ​នេះ​ហើយ តែ​នាយក​ផ្នែក​សិល្បៈ​ លោក Kobayashi ត្រូវ​ដក​តំណែង​ដោយសារ​ការប្រើប្រាស់​ពាក្យ ​កំប្លែង​បែប​រើសអើង​ពូជសាសន៍​។ ​​លោក Kentaro មាន​និន្នាការ​រើសអើង​ពូជសាសន៍ និង​ស្អប់ខ្ពើម​ជនជាតិ​ជ្វី​ហ្វ និង​ធ្លាប់​ប្រើ​ប្រាស់​ភាសា​ចំអក​ឱ្យ​ប្រវត្តិសាស្ត្រ​ដ៏​ជូរចត់​។ ​លោកស្រី Seiko Hashimoto ប្រធាន​គណៈ​កម្មាធិការ​អូឡាំពិក​ទីក្រុង​តូ​ក្យូ​បញ្ជាក់​ថា កម្មវិធី​បើក​នៅ​ថ្ងៃ​នេះ​កំពុងស្ថិត​ក្រោម​ការពិចារណា និង​រក​ដំណោះស្រាយ​បន្ទាន់​ដោយ​គ្មាន​ប្រធាន​ផ្នែក​សិល្បៈ​ ដែល​បាន​ដក​តំណែង​នោះ​។

​​នេះ​ជា​រឿង​ឈឺក្បាល​មួយទៀត​នៅ​អូឡាំពិក​លើក​នេះ បន្ទាប់ពី​គណៈកម្មការ​រៀប​ចំ​មមាញឹក​ណាស់​ទៅ​ហើយ ​ក្នុង​ការរៀបចំ​វិធានការ​សុខាភិបាល​ ដើម្បី​បញ្ចៀស​ពី​ការ​រីក​រាលដាល​ឆ្លង​នៃ​មេរោគ Covid-19 ហើយ​ករណី​ឆ្លង​ក៏​ត្រូវ​បាន​រក​ឃើញ​ជា​បន្តបន្ទាប់​ដែរ ​ពី​បណ្ដា​អត្ត​ព​លិ​ក​ដែល​ធ្វើដំណើរ​ចូល​៕

​អត្ថបទ​៖​នាង សុភា​វុ​ធ