សៀមរាប ៖ លោកជំទាវ ពុំ ច័ន្ទីនី អគ្គលេខាធិការកាកបាទក្រហមកម្ពុជា តំណាងដ៏ខ្ពង់ខ្ពស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បាននាំយកថវិកា៥ម៉ឺនដុល្លារ និងសំភារៈប្រើប្រាស់ការពារជំងឺកូវី១៩ ជាច្រើទៀត ជូនដល់កាកមន្ទីរពេទ្យកុមារអង្គរខេត្ដសៀមរាប នៅព្រឹកថ្ងៃទី២៣ ខែកក្កដា ឆ្នាំ២០២១នេះ។
ការជួយឧបត្ថម្ភថវិកា និងសំភារៈទាំងនេះ ក្នុងគោលបំណងជួយសង្គ្រោះដល់កុមារកម្ពុជា ដែលកំពុងមានជំងឺដែលទៅព្យាបាលនៅក្នុងមន្ទីរកុមារអង្គរនេះ។សំភារៈការពារជំងឺកូវីដ១៩ទាំងនោះរួមមាន អាកុល៥កាន ស្មើ១៥០លីត្រ ម៉ាស់៩កេស ស្មើរ៥០០០ម៉ាស់ ស្រោមដៃ២កេស ស្មើ២០០០រាយ ទឹកថ្នាំសម្លាប់មេរោគ ១០ប៊ីដុង ស្មើរ៥០លីត្រម៉ាស៊ីនចាំហាយ ២គ្រឿង និងថវិកា៥ម៉ឺនដុល្លារ។
លោកជំទាវ ពុំ ច័ន្ទីនី អគ្គលេខាធិការកាកបាទក្រហមកម្ពុជា មានប្រសាសន៍ផ្ដាំផ្ញើកាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន តែងតែយកចិត្តទុកដាក់យ៉ាងខ្លាំងដល់ប្រជាពលរដ្ឋពិសេសកុមារដែលកំពុងប្រឈមនឹងជំងឺ និងងាយរងគ្រោះ ទោះបីស្ថិតក្នុងស្ថានភាពបែបណាក៏ដោយ គឺតែងបានផ្តល់ភាពកក់ក្តៅដល់បងប្អូនជានិច្ច ក្នុងគ្រាលំបាកនានាពោលគឺទីណាមានទុក្ខលំបាកទីនោះ មានកាកបាទក្រហមកម្ពុជា។
លោកជំទាវ បញ្ជាក់ថា កាកបាទក្រហមកម្ពុជា បានឆ្លើយតប និងសង្គ្រោះបន្ទាន់ដល់ជនរងគ្រោះ និងជនងាយរងគ្រោះ អ្នកផ្ទុកមេរោគអេដស៍ ជនពិការ កុមារកំព្រា ចាស់ជរាគ្មានទីពឹង ស្រ្តីមេម៉ាយក្រីក្រមានកូនច្រើនជាពិសេសជួយសង្គ្រោះកុមារ។
ក្នុងឱកាសនោះដែរ លោកជំទាវក៏បានផ្តាំផ្ញើដល់បង ប្អូនប្រជាពលរដ្ឋទាំងអស់ត្រូវ មានការប្រុងប្រយ័ត្នខ្ពស់ចំពោះជំងឺកូវីដ១៩ ដែលកំពុងរាលដាលនៅក្នុងប្រទេសកម្ពុជា ក៏ដូចជាលើពិភពលោក ។ជាមួយគ្នានោះលោក ពុំ ច័ន្ទីនី បានបញ្ជាក់ថា សម្ដេចតេជោ គិតពីសុខទុក្ខកុមារជានិច្ច។លោកជំទាវ ក៏បានផ្ដាំផ្ញើឲ្យអាណាព្យាបាលត្រូវយកចិត្ដទុកដាក់អនុវត្ដវិធានការតាមការណែនាំរបស់ក្រសួងសុខាភិបាល និងការណែនាំរបស់ប្រមុខរាជរដ្ឋាភិបាលផង ៣ការពារ៣កុំផងដែរ។
លោក ងួន ច័ន្ទភក្ដ្រា ប្រធានមន្ទីរពេទ្យកុមារអង្គរខេត្ដសៀមរាប មានប្រសាសន៍ថា មន្ទីរពេទ្យកុមារអង្គរជាអង្គភាពមិនស្វែងរកប្រាក់ចំណេញ ដែលមានបេសកកម្មលើកកម្ពស់សុខុមាលភាពកុមារកម្ពុជាគ្រប់រូប។ មិនត្រឹមតែផ្តល់សេវាសុខាភិបាលដល់កុមារដោយឥតគិតថ្លៃតាំងពីឆ្នាំ១៩៩៩ ប៉ុណ្ណោះទេ តែមន្ទីរពេទ្យកុមារអង្គរក៏ជាមជ្ឈមណ្ឌលបណ្តុះបណ្តាលវេជ្ជសាស្ត្ររបស់សិស្ស និស្សិត និងមន្ត្រីសុខាភិបាលផ្សេងទៀតផងដែរ។
នៅចំពោះមុខវិបត្តិជំងឺកូវីដ១៩ ការផ្ដល់មូលនិធិពីក្រៅប្រទេសដែលជាប្រភពហិរញ្ញវត្ថុដ៏សំខាន់របស់មន្ទីរពេទ្យកុមារអង្គរបានធ្លាក់ចុះយ៉ាងគំហុក ដែលបណ្ដាលឲ្យមន្ទីរពេទ្យដ៏សប្បុរសមួយនេះ រងការប្រឈមយ៉ាងខ្លាំងក្នុងបេសកកម្មផ្តល់សេវាសុខភាពជួយសង្គ្រោះជីវិតកុមារកម្ពុជា ដោយឥតគិតកម្រៃ ប្រកបដោយគុណភាពខ្ពស់និងក្តីមេត្តា យ៉ាងតិចណាស់ចំនួន៤០០នាក់ក្នុងមួយថ្ងៃៗ។ បេសសកម្មរបស់មន្ទីរពេទ្យនេះ ផ្ដោតកម្មវិធីនៃការព្យាបាលមាន៣សំខាន់ៗ ការព្យាបាល ការអប់រំ និងការការពារ ហើយមន្ទីរពេទ្យនេះពឹងផ្អែកទាំងស្រុកលើមូលនិធិសប្បុរសធម៌៕
អត្ថបទ ៖ ឈិត សាវី