បាល់ទាត់៖ ​ខ្សែបម្រើ​បារាំង Paul Pogba បាន​បដិសេធ​សំណើ​កិច្ចសន្យា​ថ្មី​ជាមួយ​ក្រុម​បិសាច​ក្រហម Manchester United ដែលមាន​ប្រាក់​ឈ្នួល ៣៥ម៉ឺន​ផោន នេះ​បើតាម​សេចក្តីរាយការណ៍​ជាច្រើន​បាន​ចុះផ្សាយ​ម្សិលមិញ​នេះ​។

​​Paul Pogba ដែល​នៅសល់​កិច្ចសន្យា​មួយឆ្នាំ​ទៀត​នៅ Old Trafford នោះ​កំពុង​ស្ថិតក្រោម​ការចាប់​អារម្មណ៍​ក្រុម​ក្លិប​ធំៗ​មួយចំនួន​។ ​បើតាម​ការចុះផ្សាយ​រប​ស់​សារព័ត៌មាន Mirror ឱ្យដឹងថា Paul Pogba បាន​បដិសេធ​សំណើ​កិច្ចសន្យា​ថ្មី​របស់​ក្លិប ដែល​ធ្វើ​ឱ្យគេ​ជា​កីឡាករ​ដែលមាន​ប្រាក់​ឈ្នួល​ច្រើន​បំផុត​ទី២ ពីក្រោម David de Gea ដែលមាន​ប្រាក់​ឈ្នួល ៣៧ម៉ឺន ៥ពាន់​ផោន​។ ​សារព័ត៌មាន​ដដែល​បានសរសេរថា Paul Pogba មិនមាន​ចេតនា​បន្ត​ការ​ស្នាក់នៅ​ជាមួយ Manchester United រយៈ​ពេល​វែង​ទៀតឡើយ ហើយ​ក្លិប​ក៏​នឹងត្រូវ​បង្ខំចិត្ត​លក់​ចេញ​នៅ​រដូវក្តៅ​នេះ ​ប្រសើរ​ជាង​ចាកចេញ​រដូវ​កាល​ក្រោយ​ដោយ​មិនបាន​អ្វី​សោះ​។ ​Paris Saint Germain គឺជា​ក្លិប​ឈានមុខ​គេ​ក្នុង​ការចរចា​នាំយក​កីឡាករ​វ័យ ២៨ឆ្នាំ​រូបនេះ ស្របពេល Real Madrid ក៏​ធ្លាប់​បង្ហាញ​ចំណាប់អារម្មណ៍​របស់ខ្លួន​ផងដែរ​៕

​អត្ថបទ​៖​នាង សុភា​វុ​ធ