ឯកឧត្តម Anatoly Borovik អគ្គរដ្ឋទូតសហព័ន្ធរុស្សីប្រចាំនៅកម្ពុជា បានបើកធ្វើសន្និសីទសារព័ត៌មានមួយនៅថ្ងៃពុធ ទី១០ ខែមេសានេះ និងបានលើកឡើងថា នៅពេលបច្ចុប្បន្ននេះ សហរដ្ឋអាមេរិក និងសម្ព័ន្ធមិត្ត កំពុងបំផុសគំនិតនៃមេដឹកនាំនៅក្នុងបណ្តាប្រទេសក្នុងតំបន់អាស៊ីប៉ាស៊ីហ្វិក អោយស្អប់ខ្ពើមប្រទេសរុស្ស៊ី និងប្រទេសចិន ដែលជាសកម្មភាពគំរាមកំហែងដល់សន្តិសុខក្នុងតំបន់។
ឯកឧត្តម Anatoly Borovik បានបន្តថា ប្រទេសមួយចំនួននៅតំបន់អាស៊ីប៉ាស៊ីហ្វិក ដូចជាអូស្ត្រាលី នូវ៉ែលហ្ស៊េឡង់ សាធារណរដ្ឋកូរ៉េ និងប្រទេសជប៉ុនជាដើម កំពុងក្លាយទៅជាប្លុកប្រទេសដែលមានគំនិតស្អប់ខ្ពើមប្រទេសរុស្ស៊ី និងចិន ហើយមិនតែប៉ុណ្ណោះ សហរដ្ឋអាមេរិក និងសម្ព័ន្ធមិត្តកំពុងអូសទាញប្រទេសផ្សេងទៀតអោយដើរតាមយុទ្ធសាស្ត្រអវិជ្ជមានរបស់ខ្លួន ។
សូមបញ្ជាក់ជូនថា បណ្តាប្រទេសនៅតំបន់អឺរ៉ុបខាងកើតកំពុងមានអស្ថិរភាពសន្តិសុខនៅពេលបច្ចុប្បន្ននេះ ក៏ដោយសារសហរដ្ឋអាមេរិក និងសម្ព័ន្ធមិត្ត រួមទាំងអង្គការណាតូផងដែរ ដែលបានប្រើប្រាស់យុទ្ធសាស្ត្របំផុសគំនិតប្រជាពលរដ្ឋ និងមេដឹកនាំនៃបណ្តាប្រទេសក្នុងតំបន់ អោយស្អប់ខ្ពើមរុស្ស៊ី ប្រហាក់ប្រហែលគ្នានឹងសហរដ្ឋអាមេរិក ដែលកំពុងធ្វើនៅតំបន់អាស៊ីប៉ាស៊ីហ្វិកដែរនៅពេលបច្ចុប្បន្ននេះដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
