កំពង់ចាម ៖ ក្រុមហ៊ុនភេសជ្ជៈកម្ពុជា កូកា-កូឡា កាលពីថ្ងៃទី២៣ ខែកក្កដា ឆ្នាំ២០២១ បានឧបត្ថម្ភ​ធុងបែង​ចែក​សំរាម ចំនួន៦០ធុង ដល់ឃុំទាំង៣ ក្នុងស្រុកព្រៃឈរ ខេត្តកំពង់ចាម​ក្រោមកិច្ចសហការជាមួយ​អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ​ នៃក្រសួងពាណិជ្ជ​កម្ម ដើម្បីបន្តគាំទ្រ និងបំផុសសកម្មភាពគ្រប់គ្រងសំរាមប្លាស្ទិកឱ្យកាន់តែមានប្រសិទ្ធភាព។

ពិធីប្រគល់-ទទួលនេះប្រព្រឹត្តិទៅក្រោមវត្តមាន ឯកឧត្តម ផាន អូន ប្រតិភូរាជរដ្ឋាភិបាលកម្ពុជា​ទទួល​បន្ទុកជាអគ្គនាយក នៃអគ្គនាយកដ្ឋានក.ប.បតំណាងដ៏ខ្ពង់ខ្ពស់របស់ឯកឧត្តម ​ប៉ាន សូរស័ក្តិ ​រដ្ឋមន្ត្រី​ក្រសួងពាណិជ្ជកម្ម លោក ឡោ ចាន់លី អភិបាលស្រុកព្រៃឈរ ​និងកញ្ញា សម្បត្តិ មុនីវរលក្ខណ៍ នាយក​ផ្នែកទំនាក់ទំនងកិច្ចការសាធារណៈប្រចាំប្រទេសរបស់ក្រុមហ៊ុនភេសជ្ជៈកម្ពុជាកូកា-កូឡា។ ​

កញ្ញា សម្បត្តិ មុនីវរលក្ខណ៍ មានប្រសាសន៍ថា៖ ក្រុមហ៊ុនភេសជ្ជៈកម្ពុជាកូកា-កូឡា ជឿជាក់ថា​ ធុងបែងចែកសំរាមទាំង៦០ធុងបន្ថែមនេះ នឹងរួមចំណែកបង្កើនប្រសិទ្ធភាពនៃការបែងចែកសំរាម ងាយ​ស្រួល​ក្នុងការទាញយកមកកែច្នៃឡើងវិញនៅសំរាមប្លាស្ទិក និងគ្រប់គ្រងសំរាមប្រភេទផ្សេងទៀតបានល្អ​ប្រសើរ​។ កង្វល់ជុំវិញការគ្រប់គ្រងសំរាម និងការលើកកម្ពស់បរិស្ថានស្អាត ជាកង្វល់រួម ដែលទាមទារ​ឱ្យ​មាន​ការចូលរួមពីគ្រប់ផ្នែកពាក់ព័ន្ធ ជាពិសេសការអនុវត្តរបស់ប្រជាពលរដ្ឋ​នៅក្នុងសហគមន៍​យើងផ្ទាល់​។

ក្នុងនាមក្រសួងពាណិជ្ជកម្ម ឯកឧត្តម ផាន អូន បានថ្លែងអំណរគុណដល់ក្រុមហ៊ុនភេសជ្ជៈកម្ពុជាកូកា-កូឡា ដែលតែងតែចូលរួមសហការក្នុងសកម្មភាពការងារជួយសង្គម​តួយ៉ាងថ្ងៃនេះធុងបែងចែកសំរាមទាំង​៦០​ធុងនេះនឹងចូលរួមចំណែកក្នុងការជួយថែរក្សាបរិស្ថាន និង​អនាម័យក្នុងមូលដ្ឋានឃុំទាំងបីនេះ​ប្រកប​ដោយប្រសិទ្ធភាពក្នុងបរិបទនៃការរីករាលដាលជំងឺកូវីដ១៩នេះ។ នាឱកាសនោះដែរ ឯកឧត្តម ក៏បាន​ចុះ​ពិនិត្យទីតាំងជាមួយតំណាងក្រុមហ៊ុនភេសជ្ជៈកម្ពុជាកូកា-កូឡា ក្នុងការកសាងប៉មចម្រោះទឹក​ស្អាត​មួយ​កន្លែងនៅក្នុងវិទ្យាល័យហ៊ុនសែនគរ ដែលនឹងត្រូវសាងសង់នាពេលខាងមុខឆាប់ៗនេះ។

សូមបញ្ជាក់ផងដែរថា ធុងបែងចែកសំរាមទាំង៦០ធុងនេះ​ត្រូវបានប្រគល់ជូនរដ្ឋបាលឃុំទាំងបី​ខាងលើ​ដើម្បីផ្តល់ជូនទៅតាមសាលារៀនសាលាឃុំមណ្ឌលសុខភាព វត្តអារាមនិងផ្សារនានា​នៅក្នុងមូលដ្ឋានឃុំ​នីមួយៗ​ ទុកសម្រាប់ប្រើប្រាស់ក្នុងការចូលរួមលើកកម្ពស់កិច្ចគាំពារបរិស្ថាន​ប្រកបដោយចីរភាព​ដោយ​គាំទ្រនិងបំផុសសកម្មភាពគ្រប់គ្រងសំរាមប្លាស្ទិកឱ្យកាន់តែមានប្រសិទ្ធភាពស្របតាមចក្ខុវិស័យ«រួមគ្នាដើម្បីបរិស្ថានស្អាត»។ គិតត្រឹមថ្ងៃនេះ ធុងបែងចែកសំរាមចំនួន៨៧០ធុង ត្រូវបានដាក់ជូន និងកំពុង​ប្រើប្រាស់នៅសាលារៀន ទីកន្លែងសាធារណៈ រមណីយដ្ឋាននានា ទូទាំងព្រះរាជាណាចក្រកម្ពុជា ក្រោមកិច្ចសហការពីអាជ្ញាធរមូលដ្ឋានតាមបណ្តាខេត្ត ក្រសួងបរិស្ថាន ក្រសួងទេសចរណ៍​ ក្រសួងអប់រំ យុវជន និងកីឡា រួមទាំងអង្គការពាក់ព័ន្ធនានា៕ អត្ថបទ៖ រដ្ឋា