ប្រធានាធិបតីបារាំង លោកអេម៉ានុយអែល ម៉ាក្រុង ( Emmanuel Macron) បានអំពាវនាវឲ្យឧស្សាហកម្មការពារជាតិរបស់ប្រទេសរបស់លោក បង្កើនការផលិតអាវុធជាអចិន្ត្រៃយ៍ ដោយសារសង្រ្គាមនៅអ៊ុយក្រែន។

លោកម៉ាក្រុង បាននិយាយកាលពីថ្ងៃព្រហស្បតិ៍នៅពិធីបើកការដ្ឋានសាងសង់រោងចក្រផលិតគ្រាប់រំសេវ ថ្មីសម្រាប់ក្រុមហ៊ុន Eurenco នៅទីក្រុង Bergerac ភាគនិរតីថា៖«យើងត្រូវរៀបចំខ្លួនយើងជាអចិន្ត្រៃយ៍សម្រាប់ការផ្លាស់ប្តូរភូមិសាស្ត្រនយោបាយ និងភូមិសាស្ត្រ ដែលឧស្សាហកម្មការពារជាតិ នឹងដើរតួនាទីកាន់តែខ្លាំងឡើង»។

លោកបានបន្ថែមថា សេដ្ឋកិច្ចសង្រ្គាម គឺត្រូវការជាចាំបាច់ ដើម្បីអាចផ្គត់ផ្គង់ដល់អ៊ុយក្រែននូវសព្វាវុធ ដើម្បីទប់ទល់ការឈ្លានពានរបស់រុស្ស៊ី និងសម្រាប់ការពារខ្លួនផងដែរ។ ការជំរុញនេះ បានចាប់ផ្តើមនៅអឺរ៉ុប និងទូទាំងពិភពលោក។

លោកបានបញ្ជាក់ថា៖«សេដ្ឋកិច្ចសង្រ្គាមនេះ ក៏បម្រើផលប្រយោជន៍ដល់យើងផងដែរ។ ជាឧទាហរណ៍ ការផលិតកាំភ្លើង Caesar ដែលផ្គត់ផ្គង់ទៅឲ្យអ៊ុយក្រែនឥឡូវនេះ បានកើនឡើងបីដង ដែលជាការជំរុញឲ្យមានការនាំចេញកាំភ្លើងផងដែរ។

លោកបានសង្កត់ធ្ងន់ថា អឺរ៉ុបមិនអាចបោះបង់ចោលអ៊ុយក្រែនទេ ខ្លួនគឺត្រូវគិតអំពីសន្តិសុខផ្ទាល់ខ្លួនផងដែរ។

លោកប្រធានាធិបតីម៉ាក្រុង បាននិយាយថា៖«យើងអឺរ៉ុបត្រូវតែធ្វើកាន់តែច្រើន ហើយត្រូវតែធ្វើវាឲ្យលឿនជាងមុន ហើយប្រសិនបើមូលនិធិរបស់សហរដ្ឋអាមេរិក មិនមាននៅទីនោះ យើងអឺរ៉ុប ត្រូវតែប្រមូលផ្តុំ និងស្វែងរកដំណោះស្រាយហិរញ្ញវត្ថុថ្មីមួយ» ។ «យើងកំពុងធ្វើការលើនេះ ក្នុងក្នុងការសហការជាមួយនឹងប្រទេសអាល្លឺម៉ង់»។