ក្រសួងសុខាភិបាលនៃតំបន់ហ្កាហ្សា កាលពីថ្ងៃសុក្រ (ទី១២ ខែមេសា) បាននិយាយថា ការវាយប្រហាររបស់អ៊ីស្រាអែលដែលកំពុងបន្តមាន បានសម្លាប់ជនជាតិប៉ាឡេស្ទីនចំនួន ៣៣.៦៣៤នាក់ហើយ នៅក្នុងតំបន់ហ្កាហ្សា ជាកន្លែងដែលជំរុំជនភៀសខ្លួននៅផ្នែកកណ្តាលនៃតំបន់នេះត្រូវបានវាយប្រហារម្តងហើយម្តងទៀតដោយកងកម្លាំងអ៊ីស្រាអែលដែលបានអះអាងថា ការវាយលុករបស់ពួកគេ គឺដើម្បីប្រយុទ្ធប្រឆាំងនឹងក្រុមហាម៉ាស។

ចំនួនអ្នកស្លាប់របស់ប៉ាឡេស្ទីនត្រូវបានចេញផ្សាយរួមជាមួយនឹងតួលេខអ្នករបួសចំនួន ៧៦.២១៤នាក់ ហើយក្រសួងសុខាភិបាលក៏បានរាយការណ៍ផងដែរថា ក្នុងរយៈពេល ២៤ម៉ោងចុងក្រោយនេះ ប្រតិបត្តិការយោធារបស់អ៊ីស្រាអែលបានបណ្តាលឲ្យមនុស្សស្លាប់ចំនួន ៨៩នាក់ និងរបួស ១២០នាក់ នៅដែនដីនោះ។

នៅក្នុងសេចក្តីថ្លែងការណ៍មួយដែលបានចេញផ្សាយនៅថ្ងៃដដែលនោះ កងកម្លាំងការពារជាតិអ៊ីស្រាអែល (IDF) បានឲ្យដឹងថា ខ្លួនបានបន្តការវាយប្រហារលើក្រុមហាម៉ាស ជុំវិញជំរុំជនភៀសខ្លួន Nuseirat នៅភាគកណ្តាលតំបន់ហ្កាហ្សា ជាទីដែលក្រុមយុទ្ធជនប្រដាប់អាវុធជាច្រើននាក់ត្រូវបានសម្លាប់ កាលពីថ្ងៃមុនដោយការប្រយុទ្ធផ្លូវគោក និងការវាយប្រហារតាមអាកាស។ លើសពីនេះទៀត នៅថ្ងៃសុក្រនោះ កងកម្លាំងអាកាសអ៊ីស្រាអែលក៏បានរាយការណ៍ថា បានវាយប្រហារលើគោលដៅជាង ៦០កន្លែង នៅតំបន់ហ្កាហ្សា។

នៅព្រឹកថ្ងៃសៅរ៍នេះ គ្រាប់រ៉ុក្កែតយ៉ាងតិច ៨គ្រាប់ ត្រូវបានបាញ់ចេញពីតំបន់ហ្កាហ្សា ចូលទៅក្នុងទីក្រុង Sderot ភាគខាងត្បូងរបស់ប្រទេសអ៊ីស្រាអែល ជាកន្លែងដែលគ្រាប់រ៉ុក្កែតមួយចំនួនត្រូវបានស្ទាក់ចាប់ ហើយមិនមានការរាយការណ៍ពីអ្នករងរបួស ឬអ្នកបាត់បង់ជីវិតនឡើយ រហូតមកដល់ពេលនេះ។

កងពលតូច Al-Quds ដែលជាឧបសម្ព័ន្ធយោធានៃចលនាជីហាតអ៊ីស្លាមប៉ាឡេស្ទីន បានអះអាងទទួលខុសត្រូវ ចំពោះការវាយប្រហារដោយគ្រាប់រ៉ុក្កែតនោះ៕